Navenda Jiyanê ya Jinan, ku ji aliyê Şaredariya Payîzava ya DBP'yî hate vekirin, ji aliyê qeyûm ve radestî KADEM'ê hate kirin, ku alîkara seroka wê keça Serokkomarê Tirk Erdogan Sumeyye Erdogan e.
Piştî ku Hevşaredarên navçeya Payîzava ya Wanê Yildiz Çetîn û Zekî Yildiz di 3'ê Sibata 2017'an de ji wezîfeyê hatin girtin, qeyûm li şaredariyê hatibû bicihkirin.
Qeymeqamê Tirk ê li Payîzavayê Osman Dogramaci, ku weke qeyûm li şaredariyê hat bicihkirin, polîtîkayên wî rê li ber nerazîbûnan vedike.
Dogramaci ku mohra xwe daniye binê gelek biryarên sosret, gelek navendên tenduristiyê û malên jinan girt.
Dogramaci niha jî Navenda Jiyanê ya Jinan ku di dema Şaredariya DBP'ê de hate vekirin radestî Komeleya Jinê û Demokrasiyê (KADEM) kir.
Alîkara Seroka KADEM'ê jî keça Serokkomarê Tirk Tayyîp Erdogan Sumeyye Erdogan e.
Hat ragihandin, Sumeyye Erdogan wê di rojên pêş de bê navçeya Payîzava ya Wanê û tevlî merasîma vekirina KADEM'ê bibe.
Hevserokê HDP'ê ya Payîzavayê Handan Karakoyûn der barê mijarê de diyar kir, ku polîtîkaya qeyûm dagirkirina şaredariyê ye û tiştekî şaş e ku ji vê ferasetê xizmet bê hêvîkirin. Karakoyûn destnîşan kir, ku gel mîna di referandûmê de wê di hilbijartina pêş de bersiva pêwîst bide.
