Agirê Newrozê bi dirûşma "Dem dema serketinê ye" li navçeya Erdîşê ya Wanê hate dadan. Xelkê Geliyê Zîlanê ji serê sibehê ve berê xwe da Hala Zebzeyan a li navenda navçeyê û ji du nuqteyên kontrolê derbasî nava qadê bû.

Qada pîrozbahiyê bi alên Partiya Demokratîk a Gelan (HDP) û Partiya Herêman a Demokratîk (DBP) hate xemilandin. Jin û ciwan bi xurtî tevlî pîrozbahiyê bûn. Girseya gel govend gerand û Newroz pîroz kir.

Tevî ku germahiya li navçeyê di bin sifirê de bi 5 pileyî ye, bi deh hezaran kes li hev civiyan û qada Newrozê dagirtin. Dayikên Aştiyê li refên herî pêş bûn. Li qadê dirûşmên "Bijî Newroz", "Dem dema serketinê ye", "Bijî berxwedana zindanan" û "Bijî Serok Apo" hatin qîrîn.

Li dû deqeyeke rêzgirtinê ji bo bîranîna şehîdan sirûda Çerxa Şoreşê hate xwendin. Piştre jî Serokê Komîteya Amadekar Nîhat Macît axivî û got, "Newroz cejna vejînê ye, cejna jinên Kurd ên berxwedêr e. Newroz bexwedana li dijî qirkeran e. Newroz berxwedana Kobanê ye, şoreşa jinê ya li Rojava ye, serketina gelan û ekolojiyê ye."

Hevserokê HDP'ê yê Navçeyê Bayram Çîçek jî got, "Li Erdîşê piştî 5 salan me agirê Newrozê dadan. Em li dijî Dehaqan û li dijî zaliman têdikoşin. Dem dema rizgariya gelê Kurd e. Newroz berdêla Sema Yuce, Kemal Pîr û bi hezaran şehîdan e. Divê em xwedî li vê derkevin. Em ê van berdêlan ji bîr nekin û timî hêjayî wan bin. Ji Geliyê Zîlan heta Agiriyê û Koçgiriyê Kurd hatin qetilkirin. Divê were zanîn ku me ti carî serî netewand, em ê netewînin. Gelê Kurd wê xwedî li rastî û dîroka xwe derkeve. Kurd wê xwedî li têkoşerên ji bo çand, ziman û Kurdistanê derkeve."

Piştî axaftinan Koma Aryen derkete ser dikê û stranên xwe got. Bi konserê re agirê Newrozê yê destpêkê yê herêma Serhedê hate dadan. Şêniyên Geliyê Zîlanê li dora êgir govend gerandin.