Pîrozbahiya Newroza ya navçeya Çelê ya Çolemêrgê li Qada Emîrsaban hate lidarxistin. Qada Newrozê bi rengê kes, sor û zer hate xemildandin. Xelkê Çelê bi cil û bergên xwe yên herêmî tevlî şahiya Newrozê bûn. Di şahiyê de girseyê timî dirûşmeyên “Bijî Serok Apo“, “Bijî Newroz“ berz kirin. Hevşaredarê Bajarê Mezin yê Wanê Mustafa Avci û Endamên Meclîsa HDP’ê tevlî pîrozbahiyê bûn.

PIŞTÎ 6 SALAN AGIRÊ EWIL

Pîrozbahiya Newrozê bi stranan dest pê kir, gel li ber stranan xelekên govendê gerandin û her ku diçû coşa xelkê zêdetir bû. Piştî 6 salan, cara ewil bû ku li Çelê agirê Newrozê hate vêxistin. Piştî deqeyek rêzgirtinê, Hevşaredarê Bajarê Mezin yê Wanê Mustafa Avci axivîn û Newroza gel pîroz kirin.

Di axaftinan de hate destnîşan kirin ku tenê Rêberê Gelê Kurd Abdullah Ocalan dikare ji bo şerê heyî rêyeke çareseriyê pêş bixe û pîrozbahiyên Newrozê jî weke nîşaneya vê rastiyê diyar kirin.

Şahî bi stran û gerandina govendê bi dawî bû.