Endamê Komîteya Rêveber a PKK'ê Dûran Kalkan ji rojnameya Yenî Ozgur Polîtîkayê re axivî.

Kalkan diyar kir, pêvajoya ku jê re Şerê Sêyemîn ê Cîhanê tê gotin di asta herî bilind de ye û got, liv û tevgear leşkerî û dîplomatîk gelekî zêde û xurt e.

Kalkan anî ziman, pêvajoya heyî neşibe şerê cîhanê yên sedsala 20'an jî, ji aliyê îdeolojîk-siyasî ve ji Yekemîn û Duyemîn Şerê Cîhanê girantir e û hîn bi tevger e.

HER KES BI DILEKÎ HIŞK BERJEWENDIYÊN XWE ESAS DIGIRIN

Kalkan got, "Em jî, gel û tevger; hewl didin li gorî vê rastiya cîhanê tevbigerin. Hewl didin li cîhaneke wiha hebûna xwe biparêzin û bi rengekî azad bijîn."

Dûran Kalkan wiha dewam kir: "Cîhana heyî cîhaneke şer e. Lewma dema mirov xwe li gorî şert û mercên şer amade nekin, zehmet e ku li ser piyan bimîne... maf, mafnasî, dad, exlaq, pîvan mirovahî li holê nemaye. Ya heyî berjewendiyên bi dilsarî ye. Her kes bi dilekî hişk berjewendiyên xwe esas digirin û li gorî wê yekê tevdigerin."

Kalkan destnîşan kir, ji bo mirov li cîhaneke wiha hebûna xwe biparêzin pêwîste di her kêliyê de têbikoşe û got, "Yên xwe hinekî sist dikin yekser ji holê radibin."

BI RENGEKÎ DILHIŞK HEWL DIDIN ÎNKAR, ÎMHA Û QIRKIRINÊ LI KURDISTANÊ BIKIN

Kalkan bal kişand ser hewldanên ji bo tinekirina Kurdan ên sedsala dawî û got, "Êrîşên ku li vê dinyayê li kesî nehate kirin, li Kurdan hate kirin. Înkar û îmha li wan hate ferzkirin. Sîstemên desthilatdarperest-dewletperest, yên ku veguherîn hêza global-hegemonîk, civakeke bi vî rengî ji nedîtî ve hatin, xwestin tine bikin. Ya rast, êrîşa li dijî civaka Kurd ji aliyê dîrokî ve êrîşa li dijî rastiya civakî bû. Kêmasiyên xwe hebin jî, xuya ye Kurd yek ji wan civakan e ku civakîbûna xwe bi xurtî jiya û temsîl kirin. Di şexsê wan de xwestin rastiya civakî ya herêmî ji holê rakin. Bi vê armancê tifaqek, yekîtiyek çêkirin. Peyman amade kirin, rol da hinekan. Hinekan ev biryar girtin, hinekan jî destek dan. Hinek jî bûn tetîkkêş. Bi qirkirineke ku mîna wê nehatiye dîtin, xwestin civaka Kurd di nava sed salî de parçe bikin û rewşa wan a rêxistinî ji holê rakin. Hîn jî bi vê îdîayê radibin û dixwazin bikin. Li hin parçeyan ev zîhniyet û siyaset hatibe qelskirin jî, hîn jî hêzên li piraniya Kurdistanê serdest in, bi rengekî dilhişk dixwazin înkar, îmha û qirkirina li Kurdistanê bidomînin."

Dûran Kalkan bal kişand ser komploya navneteweyî ya 20 sal berê li dijî Rêberê Gelê Kurd Abdullah Ocalan hate kirin û got, "Sîstemê di asta global de ji bo berjewendiyên xwe xwest qirkirina Kurdan bibe serî. Bi vê armancê êrîşek kirin ku em jê re komploya navneteweyî dibêjin. Di encama vê komployê de sîstema êşkenceyê û tecrîda li Îmraliyê derxistin holê. Komkujî û qirkirin di şexsê Rêber Apo de li dijî îradeya azadiyê ya civaka Kurd hate kirin û bi sîstema êşkenkceyê û tecrîda li Îmraliyê re ev yek gihand asteke bilind. Ji vê yekê re, tecrîdkirina tevahiya civakê tê gotin.

Sîstemeke bi vî rengî ya rêveberiyê derxistin holê. Ev sîstema rêveberiyê li Kurdistanê li dijî civaka Kurd di çarçoveya şerê taybet de her şêwe êrîşên tinekirinê dike. Ev sîstema rêveberiyê zexta faşîst û terorê li gelên li Tirkiyeyê dike. Di encama vê yekê de jî, sîstema TC'yê bîst salên dawî hîn vekirî veguherî dîktatoriya faşîst. Ev karakter ji xwe derketibû holê."

LI DIJÎ ÊRÎŞKARIYA FAŞÎST A TOPYEKÛN, BERXWEDANA TOPYEKÛN

Kalkan bi bîr xist, Rêberê Gelê Kurd Abdullah Ocalan gotibû, "Ya wê çareseriya demokratîk bibe ya jî felaket, wê felaketeke welê bibe ku kes nikare xwe jê rizgar bike" û wiha dewam kir: "Ji ber ku çareseriya demokratîk pêk nehat, pêvajoya felaketê dest pê kir. Gotinên Rêber Apo niha yek bi yek pişrast dibin. Karên ji bo çareseriyê hatin kirin weke sûcê herî metirsîdar hate dîtin. Yên ku tevlî wî karî bûn bêdaraz hatin girtin, weke sûcdarên herî giran hatin îlankirin, bi terorîstî û xayintiya li welêt hatin sûcdarkirin û tên sûcdarkirin. Komkujî, zext, teror di asta herî bilind de ne."

Endamê Komîteya Rêveber a PKK'ê Dûran Kalkan diyar kir ku hêza dijber ketiye rewşeke welê ya êrîşkariya faşîst ku êdî bi rengekî vekirî qirkirinê dike û got, "Hêzên şoreşger ji bo pêşî li vê rewşê bigirin, hêza xwe hemû seferber kirin û gihaştin asta berxwedaneke topyekûn."