Rêxistina Partiya Demokratîk a Gelan (HDP) a Êlihê li bajaroka Kaniya Henê ya navçeya Hezo û li gundên bi ser navçeyê, bi gel re civiyan. Parlementera HDP’ê ya Êlihê Feleknas Ûca, Hevşaredara Êlihê Songul Korkmaz a ku peywira wê hatiye desteserkirin û Hevşaredara Hezoyê Nazîme Avci serdana şeniyên gund kirin. Heyeta HDP’ê bi eleqeyekî mezin hatin pêşwazîkirin. Di hevdîtinên gel de tecrîd, krîza aborî û hilbijartin hatin nîqaşkirin.

 Gundiyan bi flamayên kesk, sor û zer pêşwazî li şandeya HDP’ê kirin. Parlamenter Feleknas Ûca di serdana gundan de axivî û wiha got: “Tecrîda girankirî ya li ser birêz Ocalan berdewam dike. Bi çekên qedexekirî êrişî Kurdan dikin û Kurdan dikujin. Li dijî gelê Kurd êşkence, talan û qetlîam dewam dikin. Em ê di serî de li dijî tecrîdê û hemû êrişan li ber xwe bidin û têbikoşin. Em ê bi hêza xwe li ber xwe bidin.”

 Ji gundiyan Safiya Kaya jî wiha got: “Kevneşopiya Kurdan ya berxwedanê kevneşopiyeke xurt e. Ti kes nikare bi zextan serê me bitewîne. Pereyê HDP’ê qut kirin lê pereyê me besî me ye. Em serbilind in, em ê heta dilopa xwîna xwe ya dawî li ber xwe bidin. "