Guven: Divê em dengê xwe bi têkoşîna xwe bilind bikin

Leyla Guven ku 62 roj in ji bo rakirina tecrîdê di greva birçîbûnê de ye diyar kir, tecrîdkirina Ocalan sûcekî li dijî mirovahiyê ye. Guven got, "Ji bo bidawîkirina tecrîdê, divê em dengê xwe bi têkoşînê bilind bikin."

Hevseroka KCD'ê û Parlamentera HDP'ê ya Colemêrgê Leyla Guven, ji 7'ê Mijdara 2018'an û vir ve ji bo bidawîbûna tecrîdkirina Rêberê Gelê Kurd Abdullah Ocalan di greva birçîbûnê ya bê dawî û bê dorveger de ye.

Guven ku zêdeyî 2 meh in di grevê de ye û derbasî asta krîtîk bûye, bersiv da pirsên Medya Haber TV û Servîsa Jinê.

'JI HER DEMÊ BÊHTIR DILÊ MIN ARAM E'

Guven di destpêka axaftina xwe de bi bîr xist, di herikîna dîrokê de lêgerînerên rastiyê dema ku bi rê diketin, destpêkê nefsa xwe kontrol dikirin û got, "Derwêşên ku li cewhera hebûna jiyanê digerin, daxwazên xwe yên fîzîkî perwerde dikin, kontrol dikin. Ev kevneşopiya dîrokî di dîroka me ya nêz de bi rastiya rojiya mirinê ya mezin xwe bi zelalî nîşan da. Berxwedana li zindana Amedê bi vê kûrbûn û dewlemendiya ruhî bi ser ket. Bi dîtina min berxwedana 14'ê Tîrmehê mînakeke bêhempa ye. Bidestxistina wî ruhî, jiyana bi wî ruhî ne karekî hêsan e.

Eger ez rewşa xwe ya şexsî ji aliyê derûnî ve vebêjim, dikarim bêjim ku ruhê min tijî û zindî ye. Ji her demê bêhtir dilê min aram e. Di demên wiha de pêwîstiya her kesî pê heye ku ruhê xwe mezin û aram bike. Bi navê xwe dibêjim; ji ber ku hewldanên min ên ji bo yekkirina fikir û kiryaran zêde bûye, xwe bi şens dibînim. Ya ku ruhê mirovan mezin dike, dilsozî û baweriya bi armancê ye."

TECRÎDKIRINA OCALAN SÛCÊ LI DIJÎ MIROVAHIYÊ YE

Guven diyar kir, ji bo pêkhatin û mayindebûna aştiya civakî, ji bo afirandina jiyana demokratîk, wezîfeya her kesî ye ku bixebite û wiha dewam kir: "Bêdengî tê wateya hevkariya wî gunehî. Bêdengî nîşaneya lawaziyê ye. Tecrîdkirina Birêz Ocalan sûcekî li dijî mirovahiyê ye. Birêz Ocalan kesekî polîtîk e. Nasname û îradeya siyasî ya gelê Kurd e. Nabe ku dinya vê yekê ji nedîtî ve bê. Eger ez vê yekê dibînim û pê zane, wê çaxê her kes dibîne û pê zane. Ji ber vê yekê li ber xwe didim. Divê her kes tavilê li ber tecrîdê rabe. Pêwîste em dengê xwe bi têkoşîna xwe bilind bikin."

Guven anî ziman, ev sûcê li dijî mirovahiyê bandorê li her kesî dike û got, "Her kesê xwe mirov dibîne, divê tevlî nava têkoşîna mafdar û rewa ya gelê Kurd bibe û destekê bide."

Guven bal kişand ser xeteke hevpar a têkoşînê û berxwedana topyekûn û got, "Gelên li vê cografyayê beriya niha bi dehan caran li ber xwe dan û faşîzm têk birin. Ez dibêjim; dem dema têkoşînê ye. Bêyî dereng bimînin, bêyî berdêlên girantir bikin, em têkoşîna xwe bi ser bixînin. Eger tecrîd bê rakirin, wê demeke welê dest pê bike ku em ê bi hev re karibin nefesê bigirin, dawî li mirina mirovan bê û em ê bi hev re bijîn. Ji dil ve bi vê yekê bawer im."

OCALAN ÎRADEYA ÇARESERIYÊ YE, DIVÊ EM XWEDÎ LI VÊ ÎRADEYÊ DERKEVIN

Di dawiya axaftina xwe de Guven got, "Divê tecrîd bê rakirin, şer bisekine. Birêz Ocalan yekane rêya çareseriyê ye. Ev îrade û hêza xwe gelek caran nîşan da. Divê em xwedî li vê îradeyê derkevin. Hêzên şoreşger, demokratîk, azadîparêz, jin û ciwan divê xwedî li vê îradeyê derkevin. Bi têkoşîn, rêxistinbûn û berxwedaneke xurtir em dikarin bi ser bikevin. Em aştiya xwe ya bi rûmet, çareseriya xwe ya demokratîk û mayinde bi xwe pêk bînin. Heta ku encamê bigirin em nesekinin, li ber xwe bidin."