Dozgeriya Tirk dixwaze 114 sal cezayê girtîgehê li Bakirhan bibire

Têkildarî Hevşaredarê Sêrtê Tûncer Bakirhan ku hat girtin û li şûna wî qeyûm hat bicihkirin, doz hat vekirin. Dozgeriya Tirk di vê dozê de dixwaze Bakirhan bi 114 sal cezayê girtîgehê bê cezakirin.

Hevşaredarê Bajarê Sêrtê Tûncer Bakirhan, ji ber lêpirsîna Serzogeriya Komarê ya Tirk a li Sêrtê, roja 16'ê Mijdarê hatibû girtin. Gilînameya li dijî Bakirhan hatiye amadekirin qediya û ji aliyê 1. Dadgeha Cezayê Giran a Sêrtê ve hat qebûlkirin, Dozgeriya Tirk, bi îdîaya ku di navbera salên 2014-2016'an de 18 caran propaganda rêxistinê kiriye, 2 caran 'li ber qanûna civîn, xwepêşandan û meşê rabûye' û 'endamê rêxistinê ye' bi 114 salan cezayê girtîgehê were cezakirin. Her wiha merasîmên cenaze yên Bakirhan lê amade bû û dayîna wesayîta cenaze ya şaredariyê ji bo rakirina cenazeyan, weke sûc hatin nîşandan.

Bakirhan da xuyakirin, ku ew tevlî bi hezaran merasîmên cenaze bûye, bêyî cihêkariyê bike.