Xizm û parêzvanên parlamenterê AKP’ê Îbrahîm Halîl Yildiz di 14’ê Hezîrana sala 2018’an de li navçeya Pirsûs a Rihayê êrişî dikana malbata Şenyaşar kir. Di encama êrişê de hevjîn û du kurên dayika Emîne Şenyaşar hatin qetilkirin. Emîne Şenyaşar û kurê xwe Ferît Şenyaşar ji bo kujer bên girtin û darizandin, di 9’ê Adara sala 2021’an de li pêşiya Edliyeya Rihayê dest bi Nobeta Edaletê kirin.

Malbata Şenyaşar di roja 640’an a Nobeta Edaletê de ji mala xwe ya Pirsûsê hatin li ber deriyê edliyeyê.

Malbatê li ser hesaba xwe ya medya dijîtal wiha got: “Wezareta Edaletê ku dibêje deriyê edliyeyê deriyê edaletê ye li ku derê ye. Dayikek 640 roj in li ber deriyê Qesra Edaletê ya Rihayê li benda edaletê ye.”