Ciwanê Şengalî Eliyas Xidir Zilfo yê piştî fermanê koçî kampên Başûrê Kurdistanê kiribû, li ser rêya koçberiyê li qadeke di navbera Tirkiye û Yewnanistanê de jiyana xwe ji dest da. 6 zarokên wî jî bêxwedî hatine hiştin.
Eliyas Xidir Zilfo ji navçeya Til Izêr a Şengalê bû, ku beriya 9 salan di dema fermanê de koçî Başûrê Kurdistanê kiribû.
Eliyas Xidir Zilfo, ku li Kampa Mam Reşan a navçeya Şêxan a Duhokê dima, beriya çend rojan tevî 6 zarokên xwe berê xwe da Ewropayê û bi rê ket.
Lê belê agahî gihîşt malbata wî ya li Şengalê ku Eliyas Xidir li daristaneke navbera Tirkiye û Yewnanistanê jiyana xwe ji dest daye, 6 zarokên wî jî li wê herêmê bêxwedî mane.
Malbata Eliyas Xidir Zilfo bang li saziyên navneteweyî kirin ku cenazeyê kurê wan vegerînin û çareseriyekê ji rewşa zarokên wî re peyda bikin.
Hêjayî bibîrxistinê ye, heta niha bi dehan ciwanên Şengalê yên berê xwe dan koçberiyê li herêmên sînorên Tirkiye, Yewnanistan û Bûlgaristanê winda ne û çarenûsa wan nediyar e.
Yek ji wan jî Xêrî Nayîf Milko ye ku 6'ê Tebaxa 2023'an winda bû û hîn jî agahî jê nayê wergirtin.
