Bi sedan welatiyên bajarê Tirbespiyê cenazeyê şervanê Meclîsa Leşkerî ya Dêrezorê Mihemed Ebdularif (Nimir El-Eswed) ku 30′ê Nîsanê di Pêngva Xezeba Firatê de jiyana xwe ji dest dabû, li Goristana Şehîd Dilşêr a li gundê Dûgirê, veşartin.

Li goristanê ji bo cangoriyên azadiyê deqeyek rêz hat girtin û piştre şerbvanên YPG'ê merasîmek leşkerî lidar xistin. Dûre li ser navê Meclîsa Malbatên Şehîdan a bajarê Tirbespiyê Ebdulhelîm Hesen, Fermandarê YPG/YPJ′ê Mihemed Zêdan û xaltîka şehîd, Necah Hewar, axivîn.

Axaftvanan sersaxî ji malbata têkoşer re xwest û ragihandin ku bi saya fedekariya cangoriyên azadiyê, gelê Rojava û Bakurê Sûriyê di ewlehî û aramiyê de, dijîn.

Her wiha di axaftinan de hate destnîşankirin ku gelê Ereb, Kurd û Suryan di şerê li dijî terorê de yekîtiya xwe ava kirine û bi saya felsefeya Rêbertiyê, evqas serkeftin bi dest xistin. Her wiha bal kişandin ser girîngiya hevgirtina gelên herêmê, ji bo parastina destkeftiyên şehîdan.

Di dawiya merasîmê de nasnameya tekoşer hat xwendin û radestî malbata wî hat kirin.

Cenazeyê Şervanê Meclîsa Leşkerî ya Dêrezorê Mihemed Ebdularîf bi dirûşme û tilîliyan li Goristana Şehîd Dilşêr a li gundê Dûgirê hat veşartin.