Parlamentera Rihayê Dîlan Kunt Ayanê destnîşan kir ku ew ê li her derê bin û têkoşîna xwe bidomînin.

Parlamentera Partiya Wekhevî û Demokrasiyê ya Gelan (HEDEP) a Rihayê Dîlan Kunt Ayan ji ANF'ê re peyivî û anî ziman ku zîhniyeta yekperest hemû nasnameyên din wekî zererê dibîne û polîtîkaya 'nasnameya serdest di xetereyê de ye' dimeşîne û got, "Tevgera rastgir a populîst li ku li cîhanê belav dibe, têkildarî dînamîkên şerê cîhanê û vê yekperestiyê ye." Ayan destnîşan kir ku desthilatdar krîzên xwe wekî şerê netewe û olê nîşan didin û yên herî zêde tên mexdûrkirin jî jin in.

POLÎTÎKAYA ŞERÊ TAYBET

Ayan bal kişand ser polîtîkaya şerê taybet a dewleta Tirk a li hemberî jinan û ev yek anîn ziman: “Bi zorê fûhûşê bi jinan didin kirin, dixwazin wan bikin sîxur. Ev yek jî bi destê polês û leşkeran tên kirin û em van hemûyan wekî şerê taybet bi nav dikin. Polîtîkayên wiha li dijî jinên Kurd ên têdikoşin tên meşandin. Bi taybetî em nêzîkatiya wan a li ser saziyên wekî DOKH, KJA û TJA’yê  baş dizanin. Her wiha em dibînin ku li dijî jinên Kurd ên ku di van saziyan de dixebitin, bêdadiyeke giran a darazê heye û bi vê  bêedaletiyê hewl didin, jinên pêşeng, berxwedêr û têkoşer asteng bikin."

JI JINÊN KURD RE PEYAM E

Ayan diyar kir ku jinên ku xwe bi rêxistin dikin, xwe bi pêş ve dibin û li dijî tundiyê disekinin tên cezakirin û wiha dewam kir: “Em di van girtinan de polîtîkayeke têkbirinê dibînin. Mînak 30 sal cezayê ku li Ayşe Gokkanê hat birîn peyamek bû û dixwest wiha bibêje: 'Ey jinên Kurd, Ey jinên Kurd ên li hemberî tundiya li ser jinê li ber xwe didin û jinên Kurd ên ku ji bo ku jin di qada siyasî de aktîf bibin û ji bo azadiya jinan têdikoşin, eger hûn di nava vê têkoşînê de cih bigirin ez ê we bi cezayên tund ceza bikim'.”

BI PAŞ VE GAV NEHAT AVÊTIN

Parlamentera Rihayê Dîlan Kunt Ayan destnîşan kir ku jinan ne bi paş ve  gav avêtine û ne jî dev ji rêxistinbûnê berdane û ev yek jî gotin: "Em dev jê bernadin, li her derê ne û em ê li her derê bin."