Şewata li Cûdî û Gabarê li dorhêleke berfireh belav dibe
Şewata ku ji ber topbarana artêşa Tirk li Cûdî û Gabarê derket, li dorhêleke berfireh belav dibe. Ji ber şewatê, ku çend roj in dewam dike, tenê li Cûdî bi sedan dar şewitîn.
Şewata ku ji ber topbarana artêşa Tirk li Cûdî û Gabarê derket, li dorhêleke berfireh belav dibe. Ji ber şewatê, ku çend roj in dewam dike, tenê li Cûdî bi sedan dar şewitîn.
Li gelek herêmên Şirnex û navçeyên wê, ku "Herêma Ewlekariya Taybet" hat ragihandin, ji aliyê bi sedan leşker û cerdevanan ve operasyonên leşkerî tên meşandin. Operasyon bi giranî li herêmên Kato Jîrka, Gabar, Cûdî û Besta yên navçeya Elkê tên meşandin. Ji ber bomberdûman û topbarana ku di dema operasyonê de tên kirin, şewateke mezin li herêmê derketiye.
Herêmên ku şewat lê dorfireh bûye û bi ti awayî ji bo vemirandinê tiştek nayê kirin, çiyayên Cûdî û Gabarê ne. Ev 4 roj in ji Tabûrên Komando yên Jendermeyan ên Hîsar, Çalişkan û Gorumluyê top tên avêtin û ji ber vê topbaranê li herêma Cûdî bi sedan dar şewitîn.
Şewat ewilî li qadên Deriyê Cibraîl, Sefîne, Hesena û Girê Çolya rû da û piştî çend rojan ji ber xwe ve vemirî. Ji ber topbaranê li qadên Şax û Heblerê jî şewat derket.
Şewat ji ser rêya bejahî ya Cizîr-Silopiyayê bi hêsanî tê dîtin. Ji ber ku herêmên şewat lê derketiye "qedexe" ye, kes nikare biçe herêmê û şewatê vemirîne. Li qada Girê Çolya, ku nêzî herêma şewatê ye, bi beşdariya gelek leşkeran operasyon tê meşandin.
Wekî din, ji ber topbarana pêr a ji Tabûra Komando ya Jendermeyan a Gormeçê, li qadên Geliyê Gurdila, Bîrava, Memurika û Zivingo yên li çiyayê Gabarê şewat derket. Ev şewata ku beşek ji daristana li herêmê tine kir, hê jî didome.