Komîteya Zindanan a PAJK'ê bi wesîleya 8'ê Adarê Roja Jinên Kedkar ên Cîhanê daxuyaniyek weşand.

Daxuyanî wiha ye:

"Li warê xwedawendan, ku bi hatina biharê re jiyan bi wate dibe û bedewî xwe nîşan dide, bi veguherîna xwezayê re ku jin bi xwe re hîs dike, cîhana me ya jinê ku her sal reng bi reng dibe, kelecana me qat bi qat zêde dike. Li vê xaka ku Xwedawend lê afirîn, bi qasî fêhmkirin û zanebûna jiyanê, ruhê jinên ku bi berxwedana xwe bûn mijar ji destanan re, gihîşt vê demê. Lêgerîna jiyaneke nû ku xwe gihand rastiya wateyê, bi exlaq û hişmendiya estetîk a jinê bi wate dibe. Li dijî hovîtiya modernîteya kapîtalîst agirê berxwedanê geş dibe û bi bawerî û dilsoziya jinê ya li jiyana azad her sal mezintir dibe. Di vê demê de ku bi hatina biharê re em hîs dikin û bi berxwedaneke nû mohra xwe li her salê dixin, em 8'ê Adarê li warê Xwedawendan pîroz dikin. Bi dilsoziya bi bîranînên kêliyên bi berxwedana bi berdêlên mezin hatiye afirandin, 8'ê Adarê Roja Jinên Kedkar ên Cîhanê di serî de li Rêber Apo, di şexsê hevrê Raperîn, Amed, Bêrîvan Zîlan, Kînda Zîn, Sema Yuce, Delal Amed, Bêrîtan, Zîldan, Kurdê, Rotînda û Sara de li hevrêyên xwe yên jin ên li çiyê û zindanan li ber xwe didin, li tevahiya jinên li Kurdistanê û cîhanê pîroz dikin.

'SERHILDANA ME BI RÊBER APO RE BI WATE DIBE’

Rosa Luxemburg, Clara Zetkîn, xwişkên Mîrabel, Zarîfe, Besê û Azîmeyan ên ku di dîrokê de weke nirxên ku îro hatine afirandin, bûne meşaleyên ku rêya me ya azadiyê ronî dikin. Daxwazên azadiyê yên jinên ku li dijî zîhniyeta serdest a civaka mêr ber bi azadiyê ve meşiyane qêrînek, serhildanek e û bi 'Jin-Jiyan-Azadî' re dibe xwedî wate. Bi Rêber Apo re ev lêgerîna heqîqetê bi wate dibe. Serhildana me, meşa me bi Rêber Apo re bi wate dibe. Desthilatdarî bi zîhniyeta serdest a mêr jinan weke amûra îstîsmarê dibînin. Li hemberî vê yekê jin li hemû cîhanê bi berxwedaniya li dijî ferzkirina pergala kapîtalîst bersivê didin. Di demeke ku zext û zordariya zîhniyeta mêr di lûtkeyê de bû, li malê, li kar, li kolanan, li hemû qadên jiyanê jinan li gelek deverên cîhanê serî hilda. Bi felsefeya Rêber Apo li Efganîstan û gelek welatên din jin bi taybet jinên Rojhilat-Îranê li dijî pergala serdest a mêr daketin qadan. Îro jin li Bakurê Kurdistanê û Tirkiyeyê li çiya, gund, kargeh, li kolanan, di siyasetê de, li her cih û warên ku jiyan tê de mane rastî êrîş û zextên pir giran tên. 

'JIN WÊ SIBEROJÊ AVA BIKIN'  

Di karesata erdehejê ya ku li Bakurê Kurdistanê û Tirkiyeyê qewimî, hişmendiya qirker a dewleta Tirk car din derket holê. Li Semsûr, Hatay û Mereşê dewletê mirov terkî mirinê kirin û hewl da ku vê komkujiyê weke karesatek xwezayê nîşan bide. Bi gotina karesata sedsalê, di rastiyê de komkujî bi vî rengî pêk anî. Zarokên Kurd û Elewî revand û dixwaze ji bo pêşerojê weke kujeran amade bike. Çawa ku di Komkujiya Dersimê de ev yek kirin, dîsa îro di sedsala 21’emîn de dixwazin kujeran ji zarokên Kurd ava bikin. Li dijî vê yekê li qadên ku erdhej lê qewimî ne, piştevaniyek mezin a li ser esasê hêza cewherî ya jinan heye. Jin wê li dijî polîtîkayên bişaftinê ku dewlet dixwaze bi vê tarzê bimeşîne, piştevaniyê bi avakirina pêşerojê mezin bikin. Li ser vî esasî ji ber hilbijartinên nêz dibin jî dibe ku êrîşên li dijî jinan zêde bibin. Jin wê di qada siyasî de vê yekê pûç bikin û bi piştevaniyê bersiv bidin. Di vê sedsalê de ku enerjiya jinan zêde bûye de, em jin bawer dikin ku wê li her derê li dijî van hewldanan rêxistinbûna xwe ya cewherî mezin bikin. 

‘EM DI WÊ HÊZÊ DE NE KU TECRÎDÊ BIŞKÎNIN’ 

Êrîşên li dijî hevrêyên me yên jin ên li girtîgehan, her roja ku diçe zêde dibin. Ev jî çavkaniya xwe ji rêxistin û berxwedana jinan digire. Hêza û potansiyela jinan a li gitîgehan çêbûye, wê sîstema dewletê bihejîne. Sedemê ku îro bi hezaran girtî ne, astengkirina mezinbûna vê serhildanê ye. Em zanin ku her roj hevrêyên me yên jin ku bi komkujiyê re rû bi rû dimînin, bi îradeyek mezin di nava van 4 dîwaran de xwe li ser piyan digirin. Polîtîkaya ku tê meşandin, enerjiya jinê her kêliyê kontrol dike û îradeyê teslîm digire. Hevrêyên me bi mîrateya ku ji berxwedêrên girtîgehan ên weke hevrê Sara wergirtine, îro vê siyaseta dewletê pûç dike. Girtîgeh qadek wisan e ku di demên herî zor de jî berxwedanê mezin dike. Bi zanebûna hêza xwe, feydeyên ku bidin vê serhildanê ji her demê zêdetir in. Hevrêyên me yên li çiya li ber xwe didin, ji bo şikandina tecrîda li ser Rêber Apo û hevrêyên me yên li girtîgehan li ber xwe didin, şerekî bê hempa dimeşînin. Ev hêz çavkaniya xwe ji Rêber Apo û girtîgehan digire. Em jin xwedî wê hêzê ne ku vê tecrîd bişkînin. Divê her tim xwe ji bo vê yekê amade bikin. Em ê sedsala 21’an bi şoreşa jinê tacîdar bikin û azadiya Rêber Apo mîsoger bikin û demên azadiyê ava bikin. Hevrêyên me yên jin ên li girtîgehan hîn bêhtir xwedî vê enerjiyê ne. Lewma wê enerjiya ku tê xwestin were hepskirin, derxînin û hêzê di hundirê xwe de bibînin. Baweriya me ya li vê yekê, her roja ku derbas dibe me hîn bêhtir bi îrade û bi hêz dike. Li ser vî esasî em car din di şexsê jinên ku li girtîgehan li ber xwe didin 8’ê Adarê Roja Jinên Kedkar ên Cîhanê pîroz dikin ku em pê bawer in vê feydeya wê ji vê pêvajoyê re hebe."