Armîta Girawend ku di 1’ê Cotmehê de li paytexta Îranê Tehranê dema diçû dibistanê ji ber ku li gorî daxwaza dewletê serê xwe girênedabû polîsan lêdabû û ketibû komayê. Veşartina cenazeyê Armîta li Kirmaşanê ji aliyê rayedarên Îranê ve hat astengkirin. Cenazeyê Armîta bi merasîmekê li Goristana Beheştî Zera ya Tehranê hat veşartin.

Hate hînbûn ku 8 kesên tevli merasîma veşartina cenaze bûn, piştî ku cenazeyê Armîta di bin dorpêçê de hat veşartin, hatin girtin.

Beriya salekê jina ciwan a Kurd Jîna Emînî jî di Îlona 2022’an de li Tehranê rastî êrîşa polîsên exlaq hat û ketibû komayê. 16’ê Îlonê Jîna Emînî li nexweşxaneyê jiyana xwe ji dest da. Qetilkirina Emînî li welêt bû sedema serhildaneke mezin.