Êrîşên dagirkeriyê yên dewleta Tirk ên ku bi hevkariya PDK’ê li Başûrê Kurdistanê pêk tîne, li bajarê Koln ê Elmanyayê bi meşekê hat protestokirin.

Meş li pêşiya Dom Katerdralî destpê kir. Hevseroka Konfederasyona Med (KON-MED) Rûken Akça, Hevseroka FED-MED’ê Şevîn Sîncar û gelek Kurdistanî tevlî meşê bûn.

Girseyê pankartên bi nivîsa “Stop Turkey war on the Kurdish” û pankata bi nivîsa “Bimre xiyanet” ku wêneyên Neçîrvan Barzanî û Serokkomarê Tirk Erdogan li ser bûn, vekirin. Di dema meşê de danezanên bi Elmanî hatin xwendin û agahî ji raya giştî re hatin dayîn.

Hevseroka KON-MED’ê Rûken Akça axivî û wiha got:

“Dewleta Tirk li Başûrê Kurdistanê gundên me dişewitîne, hildiweşîne. PDK têkilî pê nayne û piştgirî dide. Heta niha 162 gundên me hatin valakirin. Hêzên navneteweyî di sedsala 20’an de bi dewletên Tirk, Ereb û Fars li hev hatin û gelê Kurdistanê bêyî statû hiştin. Li dijî gerîla çekên kîmyewî tên bikaranîn. Rojava her tim tê bombebarankirin. Sivîl tên qetilkirin. Niha jî li Başûrê Kurdistanê êrîş û llhaqa dewleta Tirk heye. Tevî vê yekê jî ne hikûmeta Iraqê û ne jî hêzên navneteweyî deng nakin. Lê divê vê bizanibin; Gelê Kurdistanê ne weke serê sedsala 20’an bêbîr e. Kesên ku xeyala dagirkerî û îlhaqê dikin wê bi ser nekevin.

Di dema meşê de gelek caran dirûşmeyên “Bijî Berxwedana Gerîla”, “Bimre Xiyanet”, “Bijî Serok Apo” û “Şehîd Namirin” hatin berzkirin. Her wiha ciwan stranên li ser gerîlayan gotin û meşiyan.

Meş di derdora saet 16:30’an de li Rudolfplatzê bi dawî bû.