Serdana Serokkomarê Elmanyayê Tanzanyayê ya naskirinê û III. Qralê Qraliyetî yê Yekbûyî Charles şermezarkirina mêtingeriya li Kenya di heman demê de pêk hatin.

Serokkomarê Elmanyayê Frank-Walter Steinmeier ji qurbaniyên komkujiya Maji-Maji (Maï-Maï) ya li Songea ya Tanzanyayê ya di destpêka sedsala 20’emîn de lêborîn xwest.

Frank-Walter Steinmeier berpirsyariya dîrokî ya Elmanyayê qebûl kir û wiha got: “Bejna xwe li ber qurbaniyên serdestiya mêtingeriya Elmanyayê xwar dikim.” Piştî serhildana Maji-Maji di navbera 1905 û 1907’an de, dîroknas texmîn dikin ku di navbera 200,000 û 300,000 nûnerên Maji-Maji de ji hêla leşkerên mêtinger ên Elman ve hatine qetilkirin.

Steinmeier bi neviyên Serfermandarê Songea Mbano re hevdîtin kir û soz da wan ku ew ê ji bo dîtina serên ku ji bo pêşandanê birin Elmanyayê têkeve nava liv û tevgerê.

Serokomar bal kişand ser zehmetiya tespîtkirina hestiyan û wiha got: “Ez soz didim ku ji bo dîtina wan li Elmanyayê hemû hewlên me çêbibin. Lê ez soz nadim ku em ê biserkevin.”

Serokomarê Elmanyayê biryardariya xwe ya ji bo rûbirûbûna paşeroja tarî ya welatê xwe nîşan da û soz da ku di dibistanan de zêdetir li ser dîroka mêtingeriya Elmanyayê raweste. Steinmeier ev tişt anî ziman: "Li Elmanyayê her kesê ku dîroka mêtingeriya Elman bêtir dizane, divê bibîne ku zilmekî çiqas mezin hatiye kirin."

Di salên dawî de, Elmanya hewldanên xwe yên ji bo bîranîn û rûbirûbûna serdema mêtingeriyê zêde kiriye û pêvajoya vegerandina hestiyên eşîrên Herero û Nama li Namîbyayê daye destpêkirin.

Frank-Walter Steinmeier anî ziman ku divê Elmanya pêvajoya rûbirûbûna vê dîrokê bidomîne û diyar kir ku armanca wî ew e ku serpêhatiyên li Tanzanyayê qewimîne bigihînin Elmanyayê da ku hîn bêhtir mirov hîn bibin.