Ji 1’ê Nîsanê ve li Zanîngeha Tokyo ya Lêkolînên Biyanî ya Japonyayê dersên Kurdî tên dayîn. Lê belê dewleta Tirk, xwe li vê jî ranegirt û Wezareta Karê Derve ya Tirk ket nava hewldanên rawestandina dersên Kurdî.
Bi tevlîbûna nêzî 40 xwendekaran 1’ê Nîsanê li zanîngeha Tokyoyê dersên Kurdî destpê kirin. Dersên ku ji hêla Vakkas Çolak ê Endamê Hîndekariya Zanîngeha Lêkolînên Biyanî ya Tokyoyê tên dayîn, piranî xwendekarên Japonî tevlî dibin.
Li zanîngehê, dersên Kurdî ket nava dersên ku herî zêde tê bijartin. Ligel Japoniyan, xwendekarên Çîn û Taywanê yên li zanîngehê dixwînin jî Kurdî dibijêrin.
Piştî ku li zanîngehê dersên Kurdî destpê kirin, Wezareta Tirk a Karê Derve, ji bo astengkirina dersan kete nav hewldanan. Hîndekar Çolak, destnîşan kir ku dersên Kurdî ji bo Akademiya Japonyayê gaveke gelek girîng e û da zanîn ku wê hewldanên Dewleta Tirk negihijin encamê.
Çolak, diyar kir ji çavkaniyên Wezareta Derve ya Japonyayê fêr bûye ku Dewleta Tirk serî li hewldaneke wiha daye û diyar kir ku ev mijar di bin ewlehiya destûra bingehîn a Japonyayê de ye û bawer dike ku wezatê bersiva pêwîst daye Wezareta Tirk.
Çolak da zanîn ku wê ders bi demdirêjî bidomin.
