8’ê Adarê Roja Jinên Kedkar ên Cîhanê li peytexta federasyona Rûsyayê, Moskowayê hat pîrozkirin.

Pîrozbahî li avahiya Mala Kurdan a Moskowayê bi tevlîbûna jinên ji netewên cuda û bi deqeyek rêzgirtinê, destpê kir. Piştre li ser wate û dîroka rojê sinevizyon hat temaşekirin. 

Endama Rêxistina Viyanê Zulfiye Haciyêva di şahiyê de axivî û behsa wateya vê rojê kir. Zulfiye Haciyêva 8’ê Adarê li Rêber Apo û hemû jinên cîhanê pîroz kir. 

Di şahiyê de nameya Rêber Apo ya derbarê 8’ê Adarê bi zimanê Rûsî hate xwendin. 

Piştî axaftinan şahî bi stran û gerandina govendê berdewam kir. Zaroka biçûk Ariya di destpêkê de helbestek ji bo mêvanan pêşkêş kir, piştre Hunermend Hemîdê Mecîd, Îbo Hacîyêv, Guhar Hasan, Îbrahîmê Silhadîn û hunermend Dado bi stran û awazên xwe ve şahî geş kirin. 

Şahî bi berzkirina dirûşmeyên “Jin, Jiyan, Azadî” û  “Bijî Serok Apo” bi dawî bû. 

SARATOV

Kurdistanî û dostên wan ên li navçeya Yerşovê ya bajarê Saratovê ya Rûsyayê bi coş Roja Jinên Kedkar ên Cîhanê pîroz kirin.

Pîrozbahî li navenda Otonomiya Çandî û Netewî ya Kurdên Rûsyayê bi deqeyek rêzgirtinê pêk hat. Piştre li ser dîrok û wateya rojê sînevîzyon hat temaşekirin. Jin derbarê giringiya rojê û rola jinan a di têkoşîna ji bo azadiyê de axivîn.

Di pîrozbahiyê de Hevseroka Navenda Çand û Hunerê ya Navçeya Yerşovê, Gulîzer Yûsibova axivî û roja 8’ê Adarê li hemû jinan pîroz kir. Yûsibova got, “Jinên Kurd îro li Rojhilata Navîn û li tevahiya cîhanê roleke pêşeng dilîzin.”

Piştî axaftinan şahî bi gerandina govend û stranan berdewam kir.

STAVROPOL

8’ê Adarê  li mala Çandê ya li gundê Fêldmarşalayê ya navça Novoalêksandrovskê ya qada Stavropolê ji hêla şarederiya gund û rêxistinên Kurd ên herêmê ve hat lidarxistin.

Di şahiyê de hunermendên ji netewên cuda cih girtin. Di destpêka şahiyê de ji bo şehîdên Kurd û Rûs deqeyek rêz hat girtin. Piştre nûnerên saziyan mêvan û beşdarvanên şahiyê pîroz kirin.  

Hunermendên ji netewên cuda bi komên xwe yên folkolorê û bi sitranên xwe ve tevlî şahiyê bûn. Hunermend Mehmed Rûstamov û Hesen Mamêdov bi stranên xwe û koma “kulîlkên Rojê” jî bi govendên Kurdî derketin ser dikê. Hunermendan gel pîroz kir û hunerên xwe pêşkêşî wan kirin. Her wiha hunermendên biçûk Avîn Axmêdova û Zîlan Bazûyêva bi stranên xwe şahî geş kirin. Di bin kelecana stranên şahiyê de govend hatin gerandin.

KRASNODAR

8’ê Adarê Roja Jinên Kedkar ên Cîhanê li navenda Mala Kurdan a li gundê Bêloyê ya qada Krasnodarê hat pîrozkirin. 

Pîrozbahî ji bo bîranîna şehîdan bi deqeyek rêzgirtinê destpê kir. Piştre sînevîzyonek li ser wate û dîroka rojê hat temaşekirin. 

Hevseroka saziya jinê ya herêmê Sînem Mehmed axaftin kir û 8’ê Adarê pîroz kir.

Sînem Mehmed, armanc û girîngîya rola Rêber Apo ya di azadiya jinê de bi berfirehî nirxand û destnîşankir ku tenê bi azadiya Rêber Apo wê pirsgirêka jin û civakê çareser bibe.

Piştre bi stranên hunermend Bazo Mehmedov, Îdrîs Bazûyêv û Barî Alîyêv û gerandina dîlanê şahî berdewam kir. Hunermendan bi stranên xwe şahî geş kirin. 

Şahî bi berzkirina dirûşmeyên “Jin, Jiyan, Azadî” û “Bijî Rêber Apo” bi dawî bû.