Cenazeyê endamê Hêzên Ewlekariya Hundirîn Xidir Qadir yê ku li Minbicê şehîd bibû, li Goristana Şehîdan a Dîjleyê ya başûrê Kobanê hat veşartin. Şêniyên herêma Firatê, endamên saziyên Rêveberiya Sivîl û partiyên herêma Firatê, tev li merasîma veşartinê bûn.

Di merasîmê de endama Koordînasyona Kongra Star a Herêma Firatê Xonav Xelîl axivî û got: “Rojane dewleta Tirk a dagirker êrîş herêmê dike. Armanca wê ya yekane û dawî, qirkirina me, şikandina vîna me û têkbirina projeya me ya demokratîk e.”

Endamê Rêveberiya Hêzên Ewlekariya Hundirîn a Minbicê Ebdullah Muslim Reşîd jî got şehîd Xidir, xewna wî azadî bû ji ber wê tev li Hêzên Ewlekariya Hundirîn bû û şehîd bû.

Reşîd bang li gelê herêmê kir ku li hember dagirkeriyê têkoşînê mezin bikin.

Di dawiya merasîmê de, wesîqeya şehîd hate xwendin û radestî malbatê hate kirin.

Piştî axaftinan cenazeye endamê Hêzên Ewlekariya Hundirîn Xidir Qadir bi dirûşmeyên “Şehîd namirin” hat veşartin.