Li Herêma Firatê bi hezaran şênî, saziyên sivîl, rêxistina jinan li dijî tecrîda girankirî a li ser Rêberê Gelê Kurd Abdullah Ocalan daketin qadan. Meş bi dirûşmeya “Azadiya Rêber Apo misogerkirina demokrasiyê û aramiya herêmê ye" destpê kir. Gel li Qada Jina Azad hatin cem hev û heta Qada Aştiyê meşa xwe domandin. Di meşê de wêneyên Rêberê Gelê Kurd Abdullah Ocalan hatin hildan û bêyî navber dirûşmeyên “Bê Serok Jiyan Nabe” û “Bijî Serok Apo” berz kirin.

Piştî meşê deqeyek rêz hate girtin û li vir Endamê Meclîsa Giştî ya Partiya Yekîtiya Demokratîk Salîh Nûh axivî. Nûh destnîşan kir ku, dixwazin di şexsê Rêberê Gelê Kurd Abdullah Ocalan de qirkirina Kurdan pêk bînin û got, “25 sal in Rêber Apo li hemberî dagikeriyê berxwedaniyek bêhempa dimeşîne. Vaye projeya Neteweya Demokratîk li Rojhilata Navîn deng daye.”

Nûh bi bîr xist ku dewleta Tirk a faşîst bêyî navber êrîşên xwe li dijî Herêmên Parastinê yên Medyayê û Bakur û Rojhilatê Sûriyeyê dewam dike.

Nûh diyar kir ku, li hemberî têkoşîna Abdullah Ocalan desthilatdarî têk çûye û got, “Heta azadiya fîzîkî ya Rêber Apo pêk tê em ê her li qadan dengê xwe bilind bikin.”