Şêniyên Kantona Kobanê şehîdên Qetlîama Şeva Xederê ya Kobanê li Goristana Şehîdan a Kobanê û ya gundê Berxbatanê bi vêxistina findan li ser gorên wan bi bîr anîn. Bi sedan şêniyên Kantona Kobanê ji bo bîranîna şehîdên Qetlîama Şeva Xedrê ya Kobanê û gundewarê wê berê xwe da Goristana Şehîdên Komkujiyê ya li ser rêya Cerablus û goristana şehîdên qetlîama ya li gundê Berxbatanê.

Li goristanê Hevserokê Meclîsa Malbatên Şehîdan Adil Hec Kerho axivî û got: "Em îro wan kesên ku xwedî têkiliyeke ruhî bi xaka xwe re bûn û bûn qurbanên DAÎŞ`ê ku ajandeya dewleta Tirk a dagirker in, bi bîr tînin. Ji ber ku qetlîam dubare nebe divê her kesek ji me xwe li hember vê xakê berpirs bibîne û xwe li gor şerê gel ê şoreşgerî bi rêxistin bike."

Di dawiya merasîmê de find li ser gorên şehîdên qetlîamê hatin vêxistin.

Hêjayî bibîrxistinê ye ku di 25'ê Hezîrana 2015'an de ango piştî 5 mehan ji têkbirina DAÎŞ'ê li Kobanê, qetlîama li Kobanê û gundê Berxbatanê pêk hat û di encamê de 243 sivîl û 30 şervanên Yekîneyên Parastina Gel (YPG) û Yekîneyên Parastina Jin (YPJ) şehîd bûn.