Akademiya Perwerdeya Leşkerî ya Şehîd Feysel Ebû Leyla 17 roj berê dewreya perwerdeyê bi beşdarbûna 220 ciwanên ji pêkhateyên Kurd û Ereb ên ji bajarê Reqayê û gundewarên wê dan destpêkirin. Dewereya ku ciwan tê de fêrî bikaranîna çekên sivik bûn îro bi merasîmekê bi dawî bû û ciwan bi fermî tevlî QSD’ê bûn.

Di merasîmê de, fermandarên QSD‘ê endamên desteyên rêveberiya xweser û bi dehan şêniyên herêmê amade bûn.

BANG LI CIWANAN HATE KIRIN

Di destpêkê de şervanan merasîmekî leşkerî lidar xistin. Piştre jî Endamê Fermandariya QSD‘ê Heyder Ehmed qedandina dewreyê li gelê Sûriyê û di serî de gelê Reqayê pîroz kir û got ku şervanên QSD‘ê ji gelê Sûriyê re hêviya rizgarkirinê ne.

Fermandarê QSD‘ê Ehmed bang li ciwanên Sûriyeyê kir ku tevlî refên QSD‘ê bibin û li dijî êrîşên ku Sûriye û projeya Netewa Demokratîk dikin hedef, bibin bersiv.

Şervanan jî soza leşkerî dan û destnîşan kirin ew ê wefedarê welatê xwe bin û şopdarên rêya şehîdan bin.

Şervanan di dawiya merasîmê de, li ber stranan govend gerandin.