Di operasyona şoreşgerî ku hêzên YPG’ê di 13’ê Îlonê de li herêma Til Hemîsê li dijî çeteyên DAIŞ’ê dabû destpêkirin de, 14 gund û gelek mezra ji çeteyan hatin paqijkirin.

Li gorî nûçeya ANHA, di operasyonê ku li herêmên Til Marûf û Til Hemîs hat destpêkirin de, çeteyan derbeyên mezin xwarin. Çavkaniyên YPG’ê destnîşan kirin ku di operasyonê de 14 gund û gelek mezra ji çeteyan hatine paqijkirin. Her wiha gelek çete hatine kuştin û gelek çek û cebilxane jî hatine desteserkirin.

Hate diyarkirin ku li xeta gundên Şermux û Ebugayf şer û pevçûn didomin.

Çav li rê ye ku YPG der barê operasyonê de daxuyaniyek berfireh bide.

DAIŞ’Ê LI TIL XELÎL Û HEDÎYATÊ KOMKUJÎ PÊK ANÎ

Hêzên YPG-YPJ’ê di 13’ê Îlonê de operasyona şoreşger dabû destpêkirin û di encamê de çeteyên DAIŞ’ê wendahiyên giran dan û li ser vê DAIŞ’ê roja Yekşemê li gundê Til Xelîl û Hedîyatê ya girêdayê Til Hemîsê komkujî pêk anî. Di komkujiyê de ji 50’î zêdetir sivîl hatin qetilkirin.