Li paytexta Rûsya Moskowê bi sernavê “Rola Rojhilata Navîna Demokratîk a di çareseriya pirsgirêka Kurd de” sêyemîn Konferansa Neteweyî ya Kurdan pêk tê. Hevserokê Giştî yê PYD’ê Salih Muslim, Parlementerê BDP’ê Bedlîsê Husamettîn Zenderlîoglû, hin parlementerên Federasyona Rûsyayê û ji Kurdistan û derveyê welat dê siyasetmedar tevil bibin.

Yekitiya Saziyên Kurdan ên Navneteweyî her sal li paytexta Rûsya Moskowê bi boneya balê bikişînin ser pirsgirêka Kurd konfransa li dar dixin. Konferansa îsal dê roja 29’ê nîsanê li Akademiya Dîplomasiyê ya Têkiliyên Derve ya Federasyona Rûsyayê bê lidarxistin.

Serokê Otonomiya Çandî û Neteweyî ya Kurdên Rûsyayê Ferhat Fetî da zanîn ku amadekariyên wan bi dawî bûne û konferans dê bi beşdariyeke payebilind pêk bê û derbarê amadekariyan de ev agahî da:

"Di sala sêyemîn a konferansê de ji derveyê welat dê Hevserokê Giştî yê PYD’ê Salih Muslim, Parlementerê BDP’ê yê Bedlîsê Husamettîn Zenderlîoglu, siyasetmedarên ji  Civaka Dewletên Serbixwe, Qezekistan, Qirgizîstan û Azarbeycanê siyasetmedarû akademîsyen, çalak tevlî konfransê bibin”

Fetî bal kişand ser rola Kurdan a di ji nû ve pêkanîna hevsengiya li Rojhilata Navîn û da zanîn ku ji ber wê jî ew konferansa îsal bi sernavê Rola Rojhilata Navîna Demokratîk a di çareseriya pirsgirêka Kurd de” pêk tînin.