Li paytexta Berlîn a Almanyayê konferanseke navnetewî ya bi ser navê ‘Rojava’ dê pêk were. Ligel Hevserokê BDP’ê Selahattîn Demîrtaş û Hevserokên PYD’ê Salih Muslîm gelek siyasetmedar û zanyarên Ewropayê dê tevlî konferansê bibin.

Sibê li Salona Meclisa Eyaleta Berlînê  konferanseke navnetewî ya bi ser navê ‘Di Sûriyeya pêşerojê de ji bo çareseriya pirsgirêka Kurd bo diyalog, demokrasî û aştiyê piştgirî’ dê pêk were.  Konferansa ku ji aliyê Navenda Xebatên Rayagiştî ya Kurdan ‘Civaka Azad’, ‘Diyalog-Kerîs’ û  parlamenterê Eyaleta SPD’ê Robert Schaddach ve tê organîzekirin seat di dê di 09.00’an destpê bike û bidome.

Konferansa ku dê 4 panel lê bê lidarxistin wek axaftinvan dê pisporê hiqûqa navnetewî Prof Dr Norman Paech, pisporê rojhilata Navîn Mîchael Luderi berdevkê Konseya Bilind a Kurd Ahmet Suleyman, Hevserokên PYD’ê Salih Muslîm, Hevserokê BDP’ê Selahattîn Demîrtaş, koordînatorê Dîalog-Kreîs Prof Dr Andreas Buro û seroka Komîteya Karê Derve ya KNK’ê Songul Karabulut tevlî bibin.

Her wiha sibê di navbera nîvro ya konferansê de dê Selahattîn Demîrtaş û Salih Muslim civînek çapemeniyê lidarbixin.

Konferans bi zimanê kurdî û almanî dê pêk were.  Her wiha ji saetên serê sibê ve li ser malpera  www.civaka-azad.org dikare bê temaşekirin.