Koordînasyona Ciwanên Rojhilata Navîn û Bakurê Sûriyeyê, têkildarê bûyer û geşedanên li Sûriyeyê daxuyaniyeke nivîskî weşand.

Koordînasyona Ciwanan, diyar kir ku herêma Rojhilata Navîn di qonaxeke mezin a dîrokî de derbas dibe û wiha got, “Ev herêm ji ber ku di gelek rastiyên dîrokî de, çi madî, çi manewî têr û tijî ye, di bin çavdêriya cîhanê de ye ku hemû hêzên herêmî û navneteweyî ji bo kontrolkirina Rojhilata Navîn hewl didin ku bi bandor bin. Armanc hêz û bandora xwe zêde bike. Hewl dide ku bi salan li ser desthilatdariyê bimîne. Eger mirov li ser rastiya dîrokê bêtir kûr bibe, em dê bibînin ku Rojhilata Navîn Dergûşa şaristaniyan û zayîna mirovahiyê ya ku ji bermayiyên cîhanê belav bûye. Lê tevî hemû tiştên ku me behs kirin jî, dewletên emperyalîst di van dused salên dawîn de bi pêşengiya Îngilîstan, Fransa û hevalbendên wan, bi Peymana Lozanê ya sala 1923’yan, bi armanca pêkanîna daxwazên xwe yên hevpar, netewa Ereban parçe kirin û kirin 26 dewlet û di nav xwe de parve kirin. Dewlemendiya li herêmê di gelek komkujî û binpêkirinên bi tundî û xwînê re derbas bû.”

Di berdewama daxuyaniyê de ev tişt hatin gotin:

“Di vir de pirsa girîng ew e ku çima van dewletan pêwîstî dîtin ku Rojhilata Navîn parçe bikin? Di bersiva vê pirsê de mirov dikare bêje ku tevî cudahiyên netewî, olî û baweriyê, gelan hebûna xwe bi avakirina konfederasyonên ku bingeha wan jiyana hevbeş bû, bi hev re rûbirûbûna li hember xeteriyên nêzîk û her cure dagirkerî û neheqiyê parastiye. Peyman û dîtinên taktîkî û stratejîk û dîrok bi eşkere behsa van peymanan dike û rastî û tijî tecrubeyên wiha ye. Lê bi dabeşkirina vê herêmê bi modela netew-dewletê re û bi xapandina ku ji bo her neteweyekê yekitiya xwe ava kirine, di vê tevgerê de ku di esasê xwe de nîşan dide ku armanca veşartî ya li pişt van parçebûnê kontrolkirin, dagirkerî û talankirin û bêparkirina gelan e ku xwe li gorî xwe û bi îradeya xwe rêve bibin.

Em wek ciwanên Rojhilata Navîn û Bakurê Efrîkayê ku di Konferansa Ciwanan a par li paytexta Lubnanê Beyrûtê hat lidarxistin de li hev civiyan û bûn yek, em dixwazin çend rastiyan ji gel û dostên xwe re parve bikin:

Dewleta Tirk piştî rêkeftina Lozanê ya sala 1923’yan yekem netew-dewlet e û ajanê yekem ê Emerîka, Îsraîl û Îngilîstanê ye. Her tim ji bo xizmeta wan emperyalîstan tê bikaranîn, Divê em bi tundî li dijî dewleta Tirk rawestin, ji ber ku em bi teqez dizanin ku destên dewleta Tirk bi êrîşa Îsraîlê ya li ser Xeze, Lubnan û Sûriyeyê heye û di encama van kiryaran de gelek keç û xortên gelên me kuştin. Em we agahdar dikin; bala xwe bidinê yekemîn welatê ku Îsraîl nas kir dewleta Tirk bû.

Erdogan ku hewl dide xwe weke dostê gelê Filistînê nîşan bide, di dema êrîşa li ser Xezeyê de jî ji bo berfirehkirina kontrola xwe û Tirkiyeyê, xetên bazirganiyê yên di navbera xwe û Îsraîlê de negirt. Ji bo vegerandina Împeratoriya Osmanî jî, her roj bi awayekî hovane û nedîtî êrîşên xwe yên li ser gelên herêmê zêdetir dikin.

‘EM KOMARA SÛRIYEYA DEMOKRATÎK AVA BIKIN’

Di van demên dawî de, piştî rûxandina rejîma Baas a dîktator, Erdogan û dewleta Tirk bi rêya çeteyên girêdayî dewleta Tirk ku îro êrîşî Bakur û Rojhilatê Sûriyê dikin û bi van hewldanan dixwazin Sûriyê bixin bin serweriya Tirkiyê û bi temamî dagir bikin. Êrîşên ji bo tasfiyekirina gelên li wir, gelê Elewî jî bi gelek binpêkirin û komkujiyan re rû bi rû maye.

Tiştekî em dixwazin ew e ku em Komara Sûriyeya Demokratîk ava bikin. Bêyî dewleteke hemwelatiyên jin û mêr, heya ku em nekevin pergala hêza demokratik a gelan em ji bermahiyên serdema Baas dernakevin.

Ji ber vê yekê em weke Koordînasyona Înîsiyatîfa Ciwanên Rojhilata Navîn û Bakurê Efrîkayê van pêkanînên li dijî gelên herêma xwe şermezar dikin û em ê ti carî qebûl nekin ku gel û baweriyan li Sûriyeyê bên tasfiyekirin. Pêwîste hikûmeta Sûriyê ya nû rê li ber van kiryaran bigire û eger wisa neke, wê ti cudahî ji Rejîma Esed tune be û ew jî bêîstîkrar be. Û divê em li ser niyeta desthilata Tirkiyê neyên xapandin, ji ber ku li pişt her nakokiyek navxweyî ye.

Divê gelê Sûriyê bizanibe ku sîstema dewleta Tirk a netewperestî dijminê hevparê hemûyan e û em tekez dikin ku tekane projeya ku li dijî van kiryarên netewperestî, olî û zayendî û zanistperestî radiweste, projeya demokratîk e ku rêzê li hemû ol û baweriyan digire û dihewîne. Bawerî û îradeya azad ji bo wan ava dike. Rê li ber avakirina civaka azad a demokratîk vedike.”