Kesên li Mûş û Bedlîsê di operasyonên qirkirina siyasî de hatibûn destgîrkirin, derxistin pêşberî dadgehê. Jina 65 salî ya bi navê Naciye Turemîş a di serê wê de ûr heye jî di nav de gelek kes girtin.
Li Bedlîsê di 12’ê sibatê de ji 6 kesên hatibûn destgîrkirin îro birin Dadgeha Bedlîsê. Serokê Rêxistina HDP’a Bedlîsê Rûmet Dûrsûn û Vedat Gunduz, Sedat Eskîn, Hanim Çelîk, Erol Orak û Naciye Turemîş a 65 salî ku ûr di serê wê de ye bi angaşta “endamên rêxistinê ne” û “propaganda rêxistinê kirine” hatin darizandin. Ji 6 kesan Dûrsûn, Eskîn, Gunduz û Çelîk bi şertê kontrola edlî hatin berdan û Turemîş û Orak jî hatin girtin û ew şandin Girtîgeha Bedlîsê.
Li Mûşê jî di 12’ê sibatê de di serdegirtina malan de endamên Meclîsa Şaredariyê yên HDP’yî Necîp Aslanşen û Fîkrî Alsak û her wiha Abdullah Polat, Abdûlhalûk Sakik, Kenan Akpolat, rêveberê Şaxa SES’ê yê berê Kadrî Ozden û kesek navê wî nehat zanîn piştî îfade dan emniyetê birin Dadgeha Mûşê.
Ji yên hatine destgîrkirin 6 kes piştî îfade dan dozgeriyê hatin berdan. Kadrî Ozden ê sendîkavan bi angaşta “Endamê rêxistinê ye” û “Propaganda rêxistinê kiriye” hat girtin û şandin Girîgeha Mûşê.
Li gundên Kazgol, Aslankaya û Yaramiş ên girêdayî navçeya Melazgirê ya Mûşê 14 welatiyên hatibûn destgîrkirin piştî îfadeyên li emniyetê hatin berdan.
