Li gelek welatên cîhanê, ji bo meşên 1'ê Mijdarê yên ji bo Kobanê, amadekarî zêde bûn. Li Îtalyayê wê li 15 navendan meş bên lidarxistin û ji bo van meşan rêxistinên civakî yên sivîl, sendîka, partiyên siaysî civînên amadekariyê lidar dixin.

Meşên global ên 1'ê Mijdarê li ser banga Komîsyona Sivîl a Tirkiye û Yekîtiya Ewropayê (EUTTC) bi dirûşma "Ji bo Mirovahiyê û Kobanê Cîhan li dijî DAIŞ'ê dimeşe" tên lidarxistin, Kurd û dostên wan ên li Îtalyayê xistin nava tevgerê.

Di 1'ê Mijarê de, Roma, Mîlano, Torîno, Pîsa, Legge, Caglîarî, Sassarî, Brescîa, Genova, Ancona, Napolî, Venedîk û Palermo jî di nav de wê li 15 navendan meş bên organîzekirin.

Ji van meşan, bi pêşengiya Komeleya Çandê ya Ararat, Buroya Enformasyonê ya Kurdistanê, Tevna Dostaniyê ya Kurdistanê û Komeleya Senza Confina, bi beşdariya nûnerên rêxistinên civakî yên sivîl, sendîka, partiyên siyasî û xwendekarên zanîngehê civîn hatin lidarxistin.

Di civînan de amadekariyên meşên 1'ê Mijdarê hatin nîqaşkirin. Biryar hat dayîn ku alîkariya însanî ji Kobanê re bê kirin, di navbera şaredariyên Roajva û şaredariyên Îtalya de hevdîtinên 'şaredariyên bira' werin kirin û di nava meha Mijdarê de heyetek ji rojnamevan, parlamenter û parêzvanên mafên mirovan biçe Rojava, raporekê amade bike û pêşkêşî parlamenta Îtalyayê bike.