Komek ji Kurdistaniyan ketin avahiya Navenda Giştî ya SPD'ê ya li paytexta Elmanya Berlînê. Kurdistaniyan nerazîbûn nîşan dan ku dewleta Tirk bi çekên Elman li Kurdistanê komkujiyan dike û alên YPG/YPJ û PYD'ê li avahiyê vekirin.

Di çalakiyê de dirûşmên "SPD destekê dide, Tirkiye bombeyan dibarîne", "Panzerên Elmanya ji Kurdistanê bicehimin", "Merkel destekê dide, Erdogan bombeyan dibarîne" hatin qîrîn. Hevserokê NCDK a Berlînê Yeko Ardil li vir axivî û diyar kir, ku bi desteka madî û çekan a Elmanyayê, Erdogan ê faşîst û dewleta Tirk zarok û jinên Efrînê dikuje.

SAARBRUCKEN

Li bajarê Saarbruckenê jî bi heman armancê mîtîngek pêk hat. Kurdistanî danê êvarê li ber Europa Galerie li hev civiyan û li ser dagirkirina Efrînê belavok belav kirin.

Zerdeşt Îsa li ser navê PYD Saarlandê axivî û destnîşan kir ku weke gelê Kurdistanê yê li Ewropayê divê ew bi rengekî bê navber xwedî li berxwedana Efrînê derkevin.