Li bajarê Tûlsayê yê eyaleta Oklahoma ya DYE’yê hin kolandin hatin kirin û hate diyarkirin ku di nav kolandinan de hin hestî hatine dîtin.

Li gorî texmînan ev hestî yên qetlîama 1921’an e. Ev qetlîam li welat yek ji qetlîama herî mezin a li ser reşikan bû.

Arkeolog Kary Stackelbeck yê di nav kolandinan de cih digire, diyar kir ku analîzên DNA nehatiye kirin û ji ber vê jî wê zû be ku agahiyeke teqez bidin.

Di sala 1921’an de li taxa Greenwood a bajarê Tûlsayê ya Oklahomayê çermspiyan girtibûn ser reşikan û di nav êrîşan de herî kêm 300 kes hatibûn qetilkirin.

Di vê qetlîamê de gelek jin û zarok hatibûn qetilkirin, hezar û 200 avahî hatibûn hilweşandin.

Baş nayê zanîn di êrîşan de çend kes hatine kuştin. Lê tê zanîn ku cenazeyê gelek kesan yan avêtine çemê bajêr, yan şewitandine û yan jî bi dizî veşartine.