Alîkarê Hevserokê HDP'ê yê ji Rêveberiyên Xwecih Bepirs, Salim Kaplan têkilî desteserkirina Şaredariya Pasûrê daxuyanî da.

Di daxuyaniyê de hate gotin, ''Ev hişmendiya ku vîna gel nas nake û hurmetê nîşan nade, herî dawî piştî teqîna li Pasûrê Hevşaredarên me kirine hedef. Hema piştî teqîna li Pasûrê Şaredariya me ya Pasûrê û rêxistina me ya navçeyê ji hêla çapemeniya desthilatdariyê ve kirine berpirs.''

Di daxuyaniyê de hate diyarkirin girtina Hevşaredar û hevalên wan ên din rasterast bi hedefnîşandana medyaya desthilatê pêk hatiye û piştî girtina wan bi çend saetan Qeymeqamê Pasûrê bi rengê qeyûm anîne ser şaredariya wan.

'BERDEWAMA DARBEYA SIYASÎ'

Kaplan got, ''Desthilat a ku bi rêya hilbijartinê şaredarî bi dest nexistî û Wezareta Navxwe, careke dî nîşan daye ku vîn û hiqûqa gel nas nake. Tiştên ku rû didin, berdewama darbeya siyasî ye ku ev ji mêj ve ye li dijî vîna gel hatiye sazkarkirin.''

'EM Ê TÊKOŞÎNA XWE BIDOMÎNIN''

Kaplan herî dawî got, ''Çawa ku duh me li ber zext û polîtîkayên desthilatê serê xwe netewandibe, niha jî em natewînin û em ê têkoşîna xwe bidomînin. Li dijî van êrîşên li ser vîna gel em bang li hemû rêxistinên civaka sivîl, odeyên pîşeeyan û saziyên din dikin ku bihistyar bin.

Em careke dî diyar dikin ku em van biryarên li dijî hiqûq û demokrasiyê qebûl nakin. Heta ku ev tayinkirin betal bibin û Hevşaredarên me werin ser karê xwe em ê dev ji têkoşîna xwe ya mafdar û rewa neqerin.''