Cemal Kobanê, Omer Bagdûr, Mele Mûstafa Tûzak û Şiyar Xelîl ên li Berlînê li dijî tecrîdkirina Ocalan di greva birçîbûnê de ne diyar kirin, "Heta ku tecrîd bi temamî bi dawî bibe wê berxwedana me bidome."
Ji bo bidawîbûna tecrîdkirina Rêberê Gelê Kurd Abdullah Ocalan, 4 aktîvîstên Kurd li Berlînê di greva birçîbûnê de ne.
Ji çalakgeran Mele Mûstafa Tûzak 115 roj, Şiyar Xelîl 102 roj, Cemal Kobanê û Omer Bagdûr jî 99 roj in di greva birçîbûnê de ne.
Çalakgeran diyar kirin, rewşeke baş e ku piştî 8 salan Rêberê Gelê Kurd Abdullah Ocalan karîbûye parêzerên xwe bibîne û destnîşan kirin, ev yek nayê wê wateyê ku tecrîd bi dawî bûye.
Aktîvîstan ragihandin, ew piştgiriyê didin daxuyaniya girtiyan a roja Duşemê û gotin, "Heta ku tecrîd bi temamî bi dawî bibe wê berxwedana me bidome."
Herî dawî komek ji şoreşgerên Başûrê Kurdistanê serdana çalakgeran kirin û diyar kirin, ew piştgiriyê didin daxwazên berxwedêran.
