Balefirên şer ên artêşa Tirk, li ser Herêmên Parastinê yên Medyayê yên di bin kontrola gerîllayan de ne, di 30'ê Nîsanê û 1'ê Gulanê de nizm firiyan.

Li gorî daxuyaniya Navenda Çapemenî - Ragihandinê ya HPG'ê (HPG-NÇR), balefirên şer li herêmên Xakurkê, Zap û Metîna nizm firiyane.

Di daxuyaniyê de hat ragihandin ku, roja 30'ê Nîsanê di navbera seetên 12.00 û 12.30 de li Xakurkê, di navbera 11.15 û 12.30 de li Zapê û di navbera seet 12.10 û 12.30'an de li herêma Metîna, balefirên şer yên artêşa Tirk nizm firiyane. Hat destnîşankirin ku, roja 1'ê Gulanê jî di navbera seet 21.00 û 23.00 de balefirên şer li qada Ertûş û xeta sînor a li herêma Zapê nizm firiyane.

HPG-NÇR'ê ragihand ku, di nava 2 rojên dawî de di navbera "Qereqola Şikêr" û "Tûgaya Çelê" ya ser bi navçeya Colemêrg Çelê, liv û tevgera helîkopterên skorsky ên artêşa Tirk heye. Di daxuyaniyê de her weha hat destnîşankirin ku, roja 1'ê Gulanê di seetên êvarê de li qada Bilican a ser bi navçeya Colemêrg Çelê, liv û tevgera helîkopterên artêşa Tirk ên bi tîpa kobra çê bûne.