Ji Komîsyona Hilbijartinê ya HDP'ê ya Wûppertalê Botî diyar kir ku li bajêr eleqeya ji bo HDP'ê her diçe zêde dibe û got, "Em ê bi hemû gelan re benda hilbijartinê ya ne adîl, di 7'ê Hezîranê de hilweşînin."

Li bajarê Elmanya Wûppertalê, xebatên HDP'yiyan ên ji bo hilbijartinên 7'ê Hezîranê yên li Bakurê Kurdistanê û Tirkiyeyê didomin.

Li ser navê Komîsyona Hilbijartinê ya HDP'ê ya Wûppertalê li Navenda Civaka Demokratîk a Kurd kombûneke bi taştê hat lidarxistin. Ji komîsyonê Lêhat Botî li kombûnê ji ANF'ê re axivî û got, "Bi hemû gelên bersiv dane banga Jiyana Nû ya HDP'ê û xwedî lê derketine re, em ê benda hilbijartinê ya ne adîl, hilweşînin.'

'SEMPATIYEK MEZIN HEYE'

Botî axaftina xwe wiha dewam kir: "Li gorî xebatên me meşandine û analîzên me kirine, li Wûppertalê zêdeyî pênc hezar hilbijêr hene. Hejmara hilbijêrên komîsyona me xwe gihandiye wan, zêdeyî hezar e. Li aliyê din, bawerî û saziyên din ên bi me re tevdigerin, lîsteya zêdeyî pênc sed hilbijêran gihandin me. Gel bi sempatiyeke mezin nêzî HDP'ê dibin, her kes xwe berpirsyar dibînin û bi awayekî aktîf di nava kar de cih digirin."

'AKP BELASEBEP DIPERPITE!'

Botî destnîşan kir ku ew ê bi gelên bindest re zîhniyeta 'yek kesî' tine bikin û got, "Her ku em kursiya wan dihejînin, ji tirsa nizanin wê çi bikin û û serî li hewldanên provokasyonan didin. Li Tendurekê bi zanebûn 15 leşker şandin mirinê. Lê bi hestiyariya gel û gerîla re ev provokasyon hat pûçkirin û dîmenên vê jî hatin kişandin. AKP belasebep diperpite. Ji ber ku ji niha ve bend hildiweşe."