Çalakiya rûniştinê ya di roja 47’emîn de ya ji bo Rêberê Gelê Kurd Abdullah Ocalan bi provokasyona polîsan dest pê kir.

Polîs serê sibê zû hatin cihê çalakiyê û bi awayekî provokatîf  xwestin ala PKK û alên din werin rakirin. Polîsan bi gotinên wekî “Eger hûn bi xwe ranekin, em ê bi xwe werin û wan alan hemûyan rakin” çalakger tehdît kirin.

Ev helwesta polîsan rastî nerazîbûna çalakgeran hat. Çalakgeran daxwaza polîsan red kir û gotin: “Em ji bo daxwazekê hatine vir. Em dixwazin ji Ocalan agahiyê bistînin. Heta ku em ji Ocalan agahiyê negirin, em ê ne alên xwe û ne jî konê xwe ranekin û em ê çalakiya rûniştinê bidomînin.”

Li ser vê biryardariya çalakgeran, polîsan  paşde gav avêtin û ji cihê çalakiyê veqetiyan. Piştî wê jî çalakgeran bi biryardariyeke mezin çalakiya xwe domandin.

Piştî nîvro ji bajarên Swîsre Basel, Bîel, Luzern û ji gelek bajarên Elmanyayê Kurdistanî hatin û tevlî çalakiyê bûn. Saet di 14’an de ji cihê çalakiyê heta ber deriyê CPT’ê meş hate lidarxistin. Kurdistaniyan bi meşê careke din bal kişandin ser girîngiya Ocalan û xwestin CPT biçe Îmraliyê. Kurdistaniyan diyar kirin ku heta ku CPT biçe Îmraliyê ango rê li ber hevdîtinekê veke, ew ê çalakiya xwe ya li vir bidomînin.