Cenazeyên şehîdên aştiyê yên li Enqereyê di Mîtînga Aştiyê de jiyana xwe ji dest dan bi girseyî tên definkirin. Cenazeyên Umut Tan, Onur Tan, Sezen Vurmaz, Gozde Aslan, Gulbahar Aydeniz û Seyhan Yaylagul li Meletiyê û cenazeyên Ayşe Deniz û Berna Koç li Îzmirê bi girseyî hatin definkirin.

MELETÎ

Di 10'ê Cotmehê de bi deh hezaran aştîxwazan ji 81 bajarên Tirkiyeyê berê xwe dan Enqereyê û xwestin Mîtînga Aştiyê pêk bînin. Di meşa mîtîngê de êrîşên bombeyên zindî pêk hat û 128 kes hatin qetilkirin û zêdeyî 600 kes jî birîndar bûn. Cenazeyên Umut Tan, Onur Tan, Sezen Vurmaz, Gozde Aslan, Gulbahar Aydeniz û Seyhan Yaylagul li Meletiyê û cenazeyên Ayşe Deniz û Berna Koç li Îzmirê bi girseyî hatin definkirin.

Li Meletiyê di merasîma cenazeyên Onur Tan, Sezen Vurmaz, Gozde Aslan û Gulbahar Aydenîz de bi deh hezaran kes meşiyan û bi girseyî cenaze defin kirin. Wekîlên HDP'ê, Serokê CHP'ê Kemal Kiliçdaroglu, endam û rêveberên HDP, DBP'ê jî beşdarî cenaze bûn. Girseyê bê navber dirûşmên, "Şehîd namirin" û "Qatil AKP" berz kirin. Piştî Serokê Meclîsa Tirkiyeyê Îsmet Yilmaz hat û xwest beşdarî merasîmê bibe girseyê êrîşî wî kir û ew qewirand. Cenazeyên Aydenîz, Aslan û Vurmaz li Goristana Bajar û cenazeyên Umut û Onur Tan jî li goristana Taxa Ugrak a Yeşîlyurtê hatin definkirin.

ÎZMÎR

Li Îzmirê jî cenazeyên Ayşe Deniz û Berna Koç ji aliyê deh hezaran kesan ve hatin definkirin. Cenazeyê endama Mala Gel a Îzmîrê Berna Koç birin Mala Gel a Konakê û li vir merasîm hat amadekirin. Bi hezaran kes beşdarî merasîmê bû. Nûner û rêveberên saziyên sivîl ên civakî û wekîlên CHP û HDP'ê beşdarî merasîmê bûn. Piştî merasîm û axaftinan cenazeyên Koç û Denîz li Goristana Dogançayê bi dirûşman hat definkirin.