Li ser nerazîbûnên gelê Şengalê 2 çeteyên DAÎŞ’ê ku tê gotin destê wan di xwîna Êzidiyan de heye ji aliyê polîsên federal ên Iraqê ve hatin destgîrkirin. Gel dixwaze çeteyan radestî hêzên YBŞ’ê û asayîşa Êzîdxanê bikin.
Nerazîbûna gelê Şengalê ya li dijî anîna hinek malbatên destê wan di xwîna Êzîdiyan de hene û di dema fermanê de bi DAÎŞ’ê re tevgeriyane berdewam dike.
Li ser nerazîbûn û gilîya Êzîdiyan, 2 kesên ku di qirkirina Êzîdiyan de cih girtine ji aliyê polîsên federal ên Iraqê ve hatin destgîrkirin.
Piştî destgîrkirina herdu çeteyan, gel li navenda polîsan kom bûn û xwestin 2 çeteyên girtî radestî Asayîşa Êzidxanê û hêzên YBŞ’ê (Yekîneyên Berxwedana Şengalê) bikin.
Li aliyê din polîsan Iraqê biryar dan ku bi Asayîşa Êzidxanê û hêzên YBŞ’ê re bicive. Di civînê de biryar hat girtin ku Asayîşa Êzidxanê û hêzên YBŞ’ê beşdarî lêpirsîna 2 çeteyên hatine destgîrkirin bibin.
Piştî ku daxwaza gel hat qebûlkirin, girse belav bû.
