Li Rojhilatê Kurdistanê ji ber barana zêde, li her derê lehî rabûbû. Di vê karesatê de gelek kes mirin û bi hezaran kesan jî ji neçarî dev ji warên xwe berdan.

Heyva Sor a Kurdistanê got ku “Lehiyê li her dera Rojhilatê Kurdistanê daye û gelek bajar û navçe û gund di bin avê de mane. Gelek kes mirine û gelek kes jî birîndar bûne. Ji ber ku têkilî bi gelek cihan nehatiye danîn, hejmara mirî û birîndaran nehatiye zelalkirin.

Ji ber şertên rê wê Heyva Sor a Kurdistanê wê bi tenê alîkariya maddî qebûl bike û ew ê pêdiviyên gel bi cih bîne.

Heyva Sor a Kurdistanê ji roja ku lehî çêbûye alîkarî daye û ji bo kirîna kon, betanî û pêdiviyên jiyanî dest bi xebatan kiriye.

Em bang li hemû gelê xwe dikin ku alîkariyê bidin gelê me yê li Rojhilatê Kurdistanê.”

Civaka Îslamî ya Kurdistanê (CÎK) ji bo alîkariyê bang kir.

CÎK’ê got ku “Li Rojhilatê Kurdistanê û li Îranê karesateke mezin çêbûye. Gelê me yê li wê derê di rewşeke xerab de ne, em bang li gelê xwe dikin ku alîkariyê bidin gelê me yên li wê derê.”

Agahiyên derbarê kampanyayê li ser malperên Heyva Sor a Kurdistanê û ya CÎK’ê heye.