Beriya hilbijartina giştî ya 24’ê Hezîrana 2018’an li navçeya Pirsûsa Rihayê, AKP’iyan êrişî malbata Şenyaşar kiribûn. Di êrişê de hevjîn û du lawên Emîne Şenyaşar ji aliyê parêzvanên parlementerê AKP’ê Îbrahîm Halîl Yildiz ve hatibûn qetilkirin. Emîne Şenyaşar û lawê xwe Ferît Şenyaşar duh bi armanca daxwaza edaletê li ber avahiya AKP’ê ya Bajêr a Rihayê dest bi çalakiya rûniştinê kiribûn. Di vê demê çalakiyê de polîsan Emîne Şenyaşar û lawê wê bi hênceta “muxalefetiya qanûna xwepêşandan û meşan kirine” destgîr kiribûn. Herduyan jî li Şaxa Ewlehiya Miduriyeta Polîsan mafê dengnekirinê bikar anîn û îfade nedan. Serê sibê herdu birin Edliyeya Rihayê û dozgeriyê îfadeyê wan girt.

Dayîka Emîne Şenyaşar a ku îfadeya xwe bi Kurdî dayî got: “Bila lawê min were berdan, bila lawê Halîl Yildiz were girtin. Zarokên min jiyana xwe ji dest dan. Bila yên kujer bên cezakirin.”

Dozger piştî kar û barên îfadeyê Emîne Şenyaşar û lawê wê Ferît Şenyaşar “bi şertê kontrola edlî” ji bo berdanê sewqî Dadgeha Cezayê Silhê kir.

Emîne Şenyaşar û lawê wê Ferît Şenyaşar ên ku derketîn dadgehê bi şertê ku di nava mehê de 2 caran îmze bavêjin hatin berdan.