Greva birçîbûnê ya Leyla Guven 149, ya girtiyan jî 111 roj in didome. Dayika Esmer Yikar ku 2 zarokên wê yên girtî di greva birçîbûnê de ne, ji bo darbest ji girtîgehan dernekeve bang li saziyên mafên mirovan ên Ewropayê û her kesî kir ku bi berpirsyariya xwe tevbigerin.

Dayik Yikar destpêkê rojbûna Rêberê Gelê Kurd Abdullah Ocalan pîroz kir û got, "Silavan li girtiyan hemûyan dikim ku li girtîgehê bedena xwe dane ber mirinê. Heta niha 6 cenaze ji girtîgehê derketin. Gelo li bendê ne ku bibe 7? Çima kesek dengê me nabihîze. Dinya çima ewqasî ker û lal e. Zarokên me gihîştine ber mirinê."

Yikar diyar kir, zarokên wê Seyfettîn û Azad di girtîgehê de ne û got, "Seyfettîn li Girtîgeha Bandirmayê ye û ji 1'ê Adarê ve bedena xwe daye ber mirinê. Kurê min ê din Azad jî 4 sal in di girtîgeha Amedê de ye. Zextên li girtiyan didomin. Ez ji vê derê bang li dayikan hemûyan dikim; bila êdî her kes rabin ser piyan. Bêdengî ne dermanê derdê me ye."