Komîteya Pîrozbahiya Newrozê ya li Êlihê, bi nêzîkbûna cejna Newrozê re dest bi amadekariyan kir.

Komîteyê ji bo pîrozbahiya 18'ê Adarê serlêdana fermî kir. Komîte ku ji DBP, HDP û gelek rêxistinên civakî yên sivîl pêk tê, amdekariyên xwe didomîne. Hevserokê DBP'ê yê Êlihê û Berpirsyarê Komîteya Pîrozbahiya Newrozê Şükrü Tapkan got, komîsyonên pîrozbahiyê û karên teknîkî dest bi kar kirine û mîna salên bihurî wê îsal jî cejna xwe ya Newrozê bi hêvî pîroz bikin.

Şükrü Tapkan destnîşan kir ku li gel şert û mercên Rewşa Awarte jî gel bi kelecaneke mezin xwe ji bo Newrozê amade dike û got, "Em ê guh nedin Rewşa Awarte û tevî gelê xwe dakevin qadan. Mîna her carê em ê bi daxwazên xwe yên aştî û azadiyê, bi rengê xwe em ê Newrozê pîroz bikin."