TJA ji bo Leyla Guven ku ev 80 roj in li dijî tecrîda li ser Rêberê Gelê Kurd Abdullah Ocalan di greva birçîbûnê de ye daxuyaniyek da.

'BERXWEDANÊ AKP-MHP Û DARAZA WÊ TIRSAND'

Di daxuyaniyê de hate gotin Leyla Guven ji gelek pêşengên têkoşîna azadiyê yek jê ye û bi bawerî û wêrekiya xwe bêyî ku rê li 'bêdengiya tirsê' veke berxwedana xwe didomîne û di demeke wiha de ku yê ku deng ji xwe derdixîne davêjin girtîgehê berxwedana Leyla Guven 'mîna çirûskê li her deverê pêketiye.”

TJA'yê got berdana Leyla Guven geşedaneke baş e lê ev bi vê re careke dî derketiye holê ku daraza Tirk bi fermana desthilata AKP-MHP'ê dixebite û ev jî ji tirsa berxwedana grevên birçîbûnê yên li zindanan, li Rojava, Hewlêr, Strasboûrg, Gallerê ye û li her devera cîhanê berbelav bûye û domand: ''Leyla Guven, lîstika bi mebesta ku berxwedanê û daxwaza berxwedanê tasfiye bike, careke dî pûç kiriye.''

BANG

TJA'yê li dawiyê got: ''Em jin bi geşkirina têkoşîna jinê, berxwedana jinê, bi hişmendiya Leyla Guven ku her deverê dike qada berxwedanê, heta ku tecrîd were şikandin têkoşîna xwe li her deverê geş bikin'' û beriya ku agahiyên mirinê ji grêvên birçîbûnê yên li zindanan, Hewlêr, Strasboûrg, Galler û bajarên dî were, banga li dînamîkên netewî û navnetewî, tevgerên jinan, şexsiyetên siyasî û aştîxwaza kir ku li daxwazên Leyla Guven û berxwedêrên greva birçîbûnê ya ji bo şikandina tecrîdê xwedî derbikevin û têkoşînê geş bikin.