Serokwezîrê Yewnanistanê Kîrîakos Mîçotakîs roja Şemiyê bi daxuyaniyekê ragihand ku wê 18 balafirên şer ên Rafale yên Fransayê û ji bo hêzên deryayî jî 4 helîkopteran bikirin.

Serokwezîr her wiha diyar kir ku wê 15 hezar leşkerên din li nava artêşê zêde bikin û hîn bêhtir endustriya parastinê fînanse bikin.

Mîçotakîs got, "Dem hatiye ku em hêzên xwe yên çekdar xurt bikin. Ev yek bernameyeke girîng e ku wê mertala neteweyî biafirîne." Mîçotakîs her wiha îdîa kir ku ev plan wê bi hezaran qadên kar jî biafirîne.

Wezîra Parastinê ya Fransayê Florence Parly jî bi rêya Twîtterê daxuyaniyek da û kêfxweşiya xwe ya ji ber firotina balafirên şer anî ziman.