Li Parîsê parêzer, pîlot û bijîşk dadikevin kolanan
Li Fransayê li hemberî reforma teqawitbûnê ya hikumetê eniyeke mezin ava bû. Vê Duşemê wê parêzer, bijîşk, pîlot û hostes di serî de gelek karker û xebatkar dakevin kolanan.
Hikumeta Fransayê dixwaze pergala teqawitbûnê biguherîne. Xebatkarên pîşeyên serbest jî bi fikar in ku wê avantaja xwe ya teqawitbûnê ji dest bidin.
Bi vê armancê wê li Parîsê saet di 13.00’an de li qada Operayê meşeke mezin li dar bixin.
Beriya meşê kolektîfeke mezin hate avakirin. Di vê kolektîfê de 14 pîşe hene. Kolektîfa bi navê SOS Retraîtes got ku “Di dîroka vî welatî de wê cara pêşîn parêzer, xebatkarên tendirustiyê û karkerên veguheztina hewayî li hemberî vê projeyê bi hev re bimeşin.”
Roja Înê jî li Parîsê grevek hatibû kirin. Di 12 salên dawîn de cara pêşîn greveke wisa mezin hate kirin.
Hikumet diyar dike ku wê pêşnûmaya guherandina vê pergala teqawitbûnê saleke din were meclîsê hewl dide nerazîbûnan nerm bike lê ji niha ve gelek rojên çalakiyan hatine diyarkirin.
Sendîkaya FO’yê ji bo çalakiya di 21’ê Îlonê de bang kir û tê payîn ku tevgera sendîkayî ya bingehîn di 24’ê Îlonê de xwe bide diyarkirin. CGT, Solîdaîres û FSÛ bangî çalakiyên di asta neteweyî de kir.
