Piştî ku li Idlibê balafirek hate xistin, medya Sûriye û Rûsyayê ragihand ku balafira artêşa Tirk e; medya Tirk û hesabên çeteyan jî îdîa kirin ku balafira Rûsya yan jî Sûriyeyê ye. Çavkaniyên ANF'ê jî ragihandin ku balafira keşfê ya artêşa Tirk e.
Li navçeya Seraqîb a Idlibê ku şer lê giran e, balafirek hate xistin. Lê belê eşkere nebû ku balafireke çawa ye û ya kê ye.
Ajansa fermî ya Sûriyeyê SANA, Rûssîa Todays û Spûtnîk ên Rûsyayê ragihandin ku balafira hatiye xistin balafireke keşfê ya artêşa Tirk e.
Ajansa fermî ya dewleta Tirk, Ajansa Anadolû (AA) îdîa kir ku balafira hatiye xistin balafireke şer a Sûriyeyê ye, lê belê ajansê nûçeya xwe piştre ji malperê vekişand.
Hin çavkaniyên nêzî çeteyên dewleta Tirk jî îdîa kirin ku balafira hatiye xistin balafireke bi tîpa L-39 a Sûriyeyê ye. Hin çavkaniyan jî îdîa kirin ku balafira hatiye xistin balafira keşfê ya Orlon-10 a Rûsyayê ye.
Lê belê çavkaniyên ANF'ê yên li herêmê ragihandin ku balafira hatiye xistin balafireke bêmirov a bi çek a dewleta Tirk e.
Rêveberiya Sûriyeyê jî ragihand ku qada hewayî ya li bakur û rojavayê Sûriyeyê bi temamî hatiye girtin û balafirên li herêmê bifirin wê bên xistin.
