Şêniyan cenazeyê şehîd Xidir ji pêşiya Meclisa Malbatên Şehîdan a bajarê Hesekê wergirtin û bi karwanekî bi dehan wesayîtan berê xwe dan Goristana Şehîdan a Şedadê.

Li goristanê merasîmeke leşkerî hate lidarxistin û piştre Hevserokê Meclisa Malbatên Şehîdan a navçeya Şedadê Nacî Necûm axivî û sersaxî ji malbatên şehîdan re xwest û wiha got: “Em ji mirinê natirsin, lê em ditirsin ku gelê me di bin zilma dijminan de bijî. Em ji bo azadî û rûmetê şer dikin.”

Necûm wiha domand: “Em bi veşartina cenazeyên şehîdan diêşin, lê belê em lehengî û berxwedana wan a ji bo azadî û rûmeta me li bîra xwe tînin. Em ê heta pêkanîna armancên şehîdan li ber xwe bidin.”

Piştre, bi navê Meclisa Leşkerî ya Şedadê Cesûr Amûdê axivî û da zanîn ku hêzên wan dê parastina gelê xwe bikin û heta rizgarkirina hemû herêman ji artêşa Tirk a dagirker û çeteyên wê li ber xwe bidin.

Piştî axaftinan, Endamê Meclisa Malbatên Şehîdan Ayat Îbrahîm wesîqeta şehîd Xidir El-Sultan xwend û radestî malbata wî kir.

Di dawiya merasîmê de cenazeyê şehîd di nava tilîliyên dayikan de hate veşartin.