Konferans li avahîya Mala Kurdan a herêmê,  bi bîranîna şehîdan dest pê kir. Ji bo revebirina konferansê li gel Feyzoyê Hisên  5 endamên dîwanê hatin hilbijartin.  Nûnerên dewletê yên herêmî û berpirsiyarên neteweyên din jî tevlî konferansê bûn û bal kişandin ser girîngiya yekîtiya netewî û konferans pîroz kirin. 

Piştre Serokê Yekîtiya Rêxistinên Kurd a Navneteweyî Arif Ezmanî axaftinek kir. Ezmanî bal kişand ser pirsgirêkên kurdên cîhanê, rewş û halê kurdên li Rûsya yê û kurdên Adîgeyê. Arif Ezmanî destnîşan kir ku di xebatên çandî û civakî yên kurdên Adîgeyê de, çendî kêmasî hebin jî bi giştî bi erênî hatine meşandin. Ezmanî ji ber karên bi encam sazî pîroz kir û dîyar kir ku wê Yekîtiya Rêxistinên Kurd a Navneteweyî li gel piştgiriya xwe her awayî  li pişt wan bin. Her wiha ji bo xurtkirina dostaniya gelên herêmê her dem amade ne kar û xebatan pêş bixin. 

Arif Ezmanî herî dawiyê bal kişand ser girîngiya xebatan û axaftina xwe bi van gotinan bi dawî kir:  “Em bi hêvî ne ku sazîya Zagrosê wê kar û xebatên xwe hîn xurttir û çalaktir bimeşîne, girêdayî hemû derfetên heyî bi gelê xwe re bi hevkarî kar û xebatên xwe bimeşîne. Ez ji hemû delegeyan re serkeftinê dixwazim.”

Hevserokê Sazîya Zagrosê Tahir Osmanov jî axivî û  weke berpirsiyarê sazîyê xebatên du salan nirxandin û girêdayî kêmasîyên ku rû dane rexnedayina xwe da û ev yek anîn ziman: ‘’Her wiha ji ber bêderfetiyê hin pirsgirêkan rû da. Ji bo ku ev pirsgirêk dubare nebin, me rêbazên çareserîyê  xistin rojeva kongreyê û em ê bi  van derfetên heyî kar û xebatên xwe baştir pêş bixin.”

Piştre hevserok hatin hilbijartin.  Di encama hilbijartinê de her du hevserokên berê Tahir Osmanov û Sînem Broyêva ji nû ve hatin hilbijartin. Hevserokan soz dan ku hê xurttir tevlî kar bibin û xwedî li pirsgirêka Kurd derkevin. 

Piştî hilbijartina hevserokan, endamên rêveberiya sazîyê jî hatin hilbijartin û di encama hilbijartinê de beşeke ji endaman hate nûkirin. 

Di dawiya konferansê de jî sazîyê plan û projeyên xwe diyar kirin. Li ser vê mijarê niqaş çêbûn û biryar hatin girtin. Di nava biryaran de biryara xurtkirina perwerdeyên ziman, werzîş û çand, çareserîya pirsgirên kurdên li herêmê û sêmînerên dîrokî hat girtin.

Konferans bi berzkirina dirûşmeyên “Bijî Serok Apo”, “Bijî Yekîtiya Gelan” û “Şehîd Namirin” bi dawî bû.