Nobeta Demokrasiyê ya li dijî tayînkirina qeyûman li Wanê dest pê kir di roja 48'an de dewam kir. Endamên Platforma Ked û Demokrasiyê ya Amed û Wanê û rêveberên Navenda Giştî ya Komeleya Mafê Mirovan (ÎHD) tevlî çalakiya îro bûn. Di nobetê de dirûşmeyên "Em ê bi berxwedanê bi ser bikevin", "Hevserokatî xeta me ya mor e" û "Qeyûm wê biçin, gel wê were" hatin berzkirin û li ser navê saziyan axaftin hatin kirin.

Rêveberê Navenda Giştî ya ÎHD'ê Îsmaîl Boyroz, di çalakiyê de axivî û wiha got: "Hilbijartin û bijartin, mafê mirovan ê herî bingehîne. Em bang li desthilatdariya siyasî dikin. Di 19'ê Cotmehê de dawî li polîtîkayên qeyûm bînin û dest ji vê helwestê berdin."

Di nobetê de hevberdevkê Platformê Mehmet Şirîn Gurbuz axavî û wiha bilêv kir: "Hikumet li aliyekê xwezayê tune dike û li aliyê din jî, gelan di jenosîdê re derbas dike. Vîna gelan desteser dike. Em ê li hemberî faşîzmê serî netewînin û em soz dikin ku emê faşîzmê hilweşînin. Em bi hev re hîn zedetir bi hêz in. Em ê bi hevre bi ser bikevin. Qeyûm wê herin û em ê bimînin."

Bedrî Yamaç jî li ser navê Platforma Ked û Demokrasiyê ya Wanê axivî û diyar kir ku tayînkirina qeyûman tê wateya desteserkirina û talankirinê. Yamaç, da zanîn ku hikumet bi van pêkanînan dixwaze rê li pêşiya polîtîkayên xwe yên şer veke.