Welatiyê herêma Dêrik, Girke Legê, herêma Koçeratan û Beravê berê xwe dan nexweşxaneya Dêrikê û cenazeya her 2 fermandarên YPG`ê Ferhad Yil (Şerzan Devrim) û Mihemed Demir (Ferhad Botan) rakirin û berbi Goristana Şehîd Xebat ve bi rê ketin.

Karwanê oxirkirina her 2 fermandaran li kolanên sereke yên bajarê Dêrikê geriya û berê xwe da Goristana Şehîd Xebat. Weliyên kampa Newroz jî derketin pêşiya karwan û bi dirûşmeya `Şehîd Namirin` karwan silav kirin.

Hevserokên Meclîsa Damezrîner a Sîstema Fedraliya Bakurê Sûriyeyê Mensûr El Selûm û Hediye Yûsif, Hevseroka Tevgera Civaka Demokratîk (TEV-DEM) Edalet Omer û Rêveberiya Kongreya Star a Kantona Cizîrê Perwîn Mihemed Emîn û nûnerên partiyên siyasî û saziyên civaka sivîl tevlî merasîmê bûn.

Girseya gel cenazeya her 2 fermandaran ber bi goristanê ve birin û şervanên YPJ/YPG`ê merasîma leşkerî lidar xistin. Fermandara YPJ`ê Jînda di merasîmê de axivî û soza şopandina rêya şehîdan da.

Her wiha Hevseroka TEV-DEM`ê Edalet Omer di merasîmê de axivî û wiha got: “ Şehîdan bi têkoşîna xwe berê me dan rêya serkeftinê û divê em têkoşîna xwe xurt bikin û hêviya hemû cangoriyan pêkbînin.ʺ

Nasnameya her du fermandaran hat xwendin û radestî malbata wan hatin kirin.

Cenazeya her du fermandaran bi dirûşmeya `Şehîd Namirin` ve hatin veşartin.

Fermandarên YPG`ê Ferhad Yil (Şerzan Devrim) û Mihemed Demir (Ferhad Botan) di Pêngava Xezeba Firatê ya rizgarkirina Reqa yê de şehîd bibûn.