Fermandariya Biryargeha Navendî ya YJA Starê, çalakiya Zîlan weke "banga li jiyana azad" bi nav kir.

Fermandariyê diyar kir, ew ê li ser şopa Sema Yuce, Gulan (Fîlîz Yerlîkaya), Dîcle Afrîn, Silav Koçer, Zîlan Pepûle û hemû şehîdên azadiyê yên dane ser şopa Zîlan bimeşin û soza serketinê da.

'HEVRÊ ZÎLAN BI BERPIRSYARIYA SERDEMÊ RABÛ'

YJA Starê bal kişand ser şert û mercên siyasî yên dema lidarketina çalakiyê û destnîşan kir, li dijî xeteriyên li ser tevgera azadiyê ya Kurd, Zeynep Kinaci bi erk û berpirsyariyên serdemê rabû û ev wezîfe bi cih anî.

Fermandariyê bibîr xist, di sala 1996'an de dijmin hemû hêza xwe ji bo tinekirin û tasfiyekirina PKK'ê seferber kiribû û komploya navneteweyî ya li dijî Rêberê me di vê demê de dabû destpêkirin.

Daxuyaniyê wiha dewam kir: "Bi gotina, 'Ya em ê biqedînin, ya em ê biqedînin' her roj li medyayê şerê taybet dihate meşandin; mirov ji gund û malên xwe dihatin birin û kuştin, îşkenceyên gelekî giran li gel dihatin kirin. Hevrê Zîlan bi hêza xwe ya hest û mejî dît, ku ev xeterî di şexsê Rêbertî de li dijî hemû jinan, gelan û mirovahiyê tê kirin û li dijî vê yekê erk û wezîfeyên xwe bi rengekî bêhempa bi cih anî.

Çeteya AKP-Qesra Erdogan a îro, ji salên 90'î dijwartir di şexsê Rêberê me de êrîşî gelê me, tevgera me ya azadiyê û nirxên mirovahiyê dike. Halbûkî di roja îro de, hêza bingehîn a ku rewşa siyasî û leşkerî yal i herêmê û cîhanê diyar dike, Rêber Apo ye. Erkên dewleta faşîst ên bi vê dizanin, hemû hêza xwe seferber kirine û êrîş dikin. Ji her demê bêhtir şerê taybet dimeşînin, hewl didin dil û mejiyê mirovan bixapînin. Her roj gotina 'Wê di Nîsanê de biqede, wê di destpêka Gulanê de biqede, qediya, li ber qedandinê ye' dubare dikin û bi zanebûn hewl didin mirovan bixapînin. Halbûkî ya diqede û wê biqede rejîma faşîst a AKP'ê ye. Tevgera Azadiyê ya Kurd îro li Rojava, bakur, Rojhilat û Başûr, ya girîng li Rojhilata Navîn bûye yek ji hêzên herî girîng û roj bi roj mezintir dibe. Dewleta Tirk jî bi polîtîka û pêkanînên xwe yên şaş, li pêşberî tevgera me qels dibe.

'EM Ê HETA SERKETINÊ ŞER BIKIN'

Yek ji faktorên bingehîn ên têkçûna dewleta Çete-AKP a faşîst, hêza YJA Starê ye ku bi bi hezaran şervanên azadiyê yên li ser şopa hevrê Zîlan in têdikoşe. Gerîlayên me yên YJA Starê, bi ruhê berxwedanê, bi şehîdan û bi derbên li dijmin dixin re, nîşan dane ku ruhê Zîlan dijî. Bi taybetî, di Pêngava Şoreşgerî ya Şehîd Bedran-Şehîd Nalîn Mûş a tevgera me de, performansa hêzên me yên YJA Starê û çalakiyên di meha Hezîranê de tên kirin, çalakiyên li gorî ruhê Zîlanbûnê ne. Weke YJA Starê em ê van çalakiyan daîmî bikin û heta serketinê em ê şer bikin. Ji ber vê yekê, ne tenê ji bo gerîla, ji bo hemû hêzên şoreşger em dibêjin; fêhmkirin û bicihanîna sekn û banga Zîlan li her qada jiyanê mirovan bi ser dixîne. Jiyana azad û avakirina demokratîk, bi rêbaza şer û jiyanê ya Zîlan dikare veguherin rastiyekê.

Çalakiay 30'ê Hezîranê banga hevrê Zîlan a li jiyana azad e. Û ev bang vediguhere helwesta berxwedanê û dengê hevpar ê bi hezaran gerîla, bi mîlyonan jinan, gelê me û hemû bindestan. Ev helwest, weke têkoşîneke ji bo jiyana azad a bi Rêberê me re, xweseriya demokratîk a li Kurdistanê û konfederalîzma demokratîk a li Rojhilata Navîn şênber dibe. Lewma erk û wezîfeyên girîng dikevin ser milê hêzên modernîteya demokratîk. Çawa ku hevrê Zîlan bi çalakiya xwe îspat kir ku jiyana azad rastiyeke, em ê jî li qadên siyasî, leşkerî û jiyanê bi çalakiyên xwe kirin jiyana azad mayinde bikin. Ji ber vê yekê wezîfeyên girîng dikevin ser milê tevahiya gelê me, bi taybetî jinên dildarên azadiyê. Roj ew roj e ku jin û gel hesab ji sîstema modernîteya kapîtalîst û sîstema komploker bixwazin û bi ser bikevin. Ev serdem ji vî alî ve xwedî gelek avantajane. Em di rojên welê de ne, ku her kesên qala azadî û demokrasiyê dikin, lazim e ji bo serketina vê têkoşînê bikevin bin bar. Em bang li hemû jinan dikin, ku bibin hevparê vê kelecan, coş û rûmeta berxwedanê.

Di salvegera çalakiya jiyana pîroz û watedar a hevrê Zîlan de, em hemû şehîdên xwe yên şoreşê careke din bi rêzdarî û minetdarî bibîr tînin û soza xwe dubare dikin ku em ê têkoşînê bi ser bixînin."